Aizawl February 9, 2023-a: MNF Vice President Lalthlengliana chuan vawiin khan MNF District Headquarters Siaha MNF party office-a 'woker's meet' neiha kalkhawmte hmaah thu sawiin, "A hmunah ka rawn kal chilh a, banna an thehluh document-te kan zir chiang a, social media-a kan lo hmuh ang ni lovin Siaha-a MNF bansantute hi a takah an lo tlem hle a, MNF kan la tam ber a, kum 2023 MLA inthlanah he laiah leh Zoram pumah MNF kan tling leh ngei dawn," a ti.

Thlenga chuan, "Nikum 2022 May thlaa Mara Autonomous District Council (MADC) kan inthlan khan MNF-in vote 13,796 kan hmu a. Tuna a chhuahsantute hi mi 90 vel chauh an lo ni. Tuna banna lehkha rawn thehlut tam ber hi a hma MDC inthlan laia kan party phatsantu leh kan party-ten party enrollment-a an telh loh party atanga hnawhchhuah sate an ni a. Min eptu tlemtein kan party beih nan, mipui tihchi-ai nan thudik tawk lo an vawrh darh mai mai a lo ni. Tuna banna thehlut nia dawt an phuahchawp zat aia tam fe chu MNF-a lawmluh mai hmabak kan nei a. Siaha District-a tawngkam lar thar tak 'Go Ahead Party (kal mai teh)' te hi tih tham an lo awm reng reng lo," tiin, thudik hrechiang theia a hmuna a kal chilh chu lawmawm a tih thu leh vannei a intih thu a sawi.

MNF Vice President chuan, "MNF party atanga chhuak reng reng politics-a ding chhuak an awm lo, Pu Lalduhhom ZMP leader-in MNF a chhuahsan hnuah kum 35 zet politics a hlawhchham pui a, Congress President Pu Sawta pawh MNF-ah kan MLA lo ni tawh, BJP President hi kan party-ah Joint Secretary lo ni tawh, candidate chan loh avanga BJP-a lut a ni. MNF atanga chhuak ten an hruai ZPM, Congress leh BJP-te hian sawrkarna an siam ngai lovang,  MNF party chhuahsana lokir leh mi thenkhat erawh party-ah dinhmun sang tak chelhte an awm thin," a ti bawk.

Vawiin Siaha District MNF Workers Meet neihah heng a hnuaia resolution pahnih an pass a ni.