Meghalaya assembly inthlan turah chief minister, National People’s Party (NPP) president ni bawk, Conrad K Sangma chuan Zirtawpni khan an party election manifesto a tlang zarh a, hna nuai nga siam leh khaw tinah sorkar dawr theihna hmun siam a tiam a. Meghalaya chu India-a state tha 10 zinga hlan kai a tiam bawk.

Sangma chuan an hmabak thlirna chuan thalaite tan remchang leh hna a siam dawn tih a sawi a; lo neitu leh thingtlang mite puih an ni dawn tih a sawi bawk.

NPP-in manifestor an tihchhuahah hian ‘Promises Delivered’ tia hming vuahin sorkar liam tura an tihhlawhtlin leh tha zawka Meghalaya an chhuah dan an tar lang tel.

Manifesto tihchhuahnaah hian Deputy Chief Minister leh Pynursla MLA Prestone Tynsong, minister leh Nartiang MLA Sniawbhalang Dhar, Raliang MLA Comingone Ymbon, Jowai MLA Wailadmiki Shylla, NPP East Shillong candidate Ampareen Lyngdoh leh an hruaitu dangte an tel.

“Kan lehkha tihchhuah hian kum nga liam ta chhungin state mipuite tan party-in ngaihtuahna sengin mellung pawimawh tak tak a phun tih a lantir a, khua leh tui zawng zawngte tan hmabak duhawm zawk siamna turin lung kan phum a ni tih a tilang chiang hle a ni,” tiin NPP-in thuchhuah an siamah tar lan a ni.

“NPP chuan he lehkha hi ‘People’s Document’ tia sawiin Meghalaya mipui zawng zawngten hma lam an pan a, ‘Better to Best’-ah Meghalaya hun chhuah a nih theihna tur kawng tar lanna a ni,” an ti bawk.

Bial 60 awmna, Meghalaya-ah hian assembly inthlan hi February 27-ah neih a ni dawn a, NPP hian BJP leh party tenau dang nen sorkarna an chelh mek a. Inthlan pawh hi BJP nen an chuh dun leh dawn.