January 16, 2023; Tukin zing dar 4:30 vel khan Trinity hospital bul, Melthum quarry thlangah Chawngte lam Gypsy a chesual a, a hmunah mi 3 an thi a, an zinga pahnih chu Chakma Autonomous District Council (CADC) a Member of District Council (MDC) an ni.

Melthum YMA te leh Kulikawn PS atanga ZALEN thudawn danin, lirthei chesual a thi te hi Mohesh Baron Chakma (40) MDC, Bono Sandro Tongchongya (46) leh Charan Singh Chakma (38) MDC te an ni. Lakhan Chakma (39) MDC leh Dillip Kumar Chakma (45) ten hliam an tuar a, anni hi Trinity hospital panpui an ni. 

Mitthi 3 te hi Melthum branch YMA in an ruang hlawmin kuang an siam sak a. ZMC lamah postmortem turin lak an ni. Kulikawn police lamte chetsualna hmunah hian thlengin, thil awmdan an enfiah nghal bawk.

Gypsy hian nimin tlai dar 4 vel khan Chawngte chhuahsanin Aizawl an rawn pan a, tukin zing khawvar hma dar 4:30 vel khan Trinity hospital chhak deuh, Melthum huam chin quarry bul kawngkawi ah tlanliam in, a kang zui nia thudawn a ni.

Lirthei chesual a awm tih an hriat ve leh Melthum branch YMA te inpunkhawmin an buaipui nghal a ni.