ZALEN, November 15, 2025: Khelh liah Mizo tlangvalten hnehna chang vek chung leh khelh khat hmabak la nei chungin Men’s U-23 State A Trophy Plate Group-ah final an lut ta a. Inrinni khan Arunachal Pradesh lakah captain Johan Lalbiakkima half century vuak chhuah nen run 41-in an chak leh.

Roar Cricket Ground, Ropar, Punjab-a inkhelah hian thum vawra chak Arunachal Pradesh-in vawm hmasak an thlang a, Mizoram tan bul tantute pahnih an cha tha nghal a, Sikkim an hneh tuma half century lo siam tawh, Johan-a’n ball 140 a hmachhawnah run 87 a siam a, a kawppui, Sahil Sharma-an run 36 a thawh bawk a, wicket hloh miah lovin run 95 an tlin thei.

Sharma thih hnuah wicketkeeper/batter C. Vanlalhruaia’n ball 47 a hmachhawnah run 45 a thawh zui a, over 50 chhungin mi pasarih thiin run 235 an tlin.

Arunachal Pradesh tlangvalten an umnaah nul an tan tha tha lo va, run an siam hmain pahnih an thi nghal a. A hnuah insiam that tumin bei hle mah se Bualpui tlangval, Nasib Rai-a’n an ngam meuh lo va, mi pathum vawm hlumin Lalhmangaihzuala leh Prem Kumar Layak ten pahnih ve ve an vawm hlum bawk a. Over 47.2-ah run 194 siam an thi zo. 

Mizoram hian an khelh tawh vawi liah Nagaland, Sikkim, Manipur leh Arunachal Pradesh an hneh ta vek a. Group inkhel hnuhnung berah Thawhtanni hian anmahni ang bawka chak vek leh final-a an hmachhawn tur chiang tawh, Meghalaya nen an inkhel dawn a, group champion an zawng dawn a. Nilaini-ah final an khel zui bawk ang.

Final hi Mohali, Punjab-a khelh tur a ni a, a chak zawkin season tharah India rama association thiam rualte awmna, Elite an kai dawn a ni.

INKHEL KHAIKHAWMNA:

Mizoram 237/7 (50 overs)

Johan Lalbiakkima 87 (140)

C. Vanlalhruaia 45 (47)

Arunachal Pradesh 194/10 (47.2 overs)

Nasib Rai - 3/28 (8 overs)

Lalhmangaihzuala Ralte - 2/39 (10 overs)

Run 41-in Mizoram an chak.