ZALEN, November 19, 2025: Men’s U-23 State A Trophy Plate Group final-ah Mizo tlangvalten Meghalaya hneh lovin Elite an kai thei ta lo va, hetih lai hian Mizoram tan chanchin lawmawm tak awm thovin inelna neih chhunga player khel tha berah captain Johan Lalbiakkima thlan a ni.

Board of Control for Cricket in India (BCCI)-in an hnuaia association-te mipa kum 23 hnuai lam inelna a buatsaih final hi Nilaini khan Mohali, Punjab-a IS Bindra Cricket Stadium-ah khelh niin Mizoram hian group stage-a an lo hneh loh tawh, Meghalaya chu run 136-in an hneh lo leh a, nomawi an hawn thei ta lo a ni.

Meghalaya hi thum vawrah chakin vuak hmasak an thlang a, over 50 chhungin run 307 siamin mi pasarih an thi a. Pushkar-a’n run 105 siama a tawp thleng a dam bakah opener Dipankar (51) leh Shavian (76) ten half century an vaw chhuak bawk.

Mizoram tan Nasib Rai chuan mi pathum vawm hlumin Sahil Sharma-a’n wicket hnih la ve bawk mah se Meghalaya batter-te chet that an dang zo lo.

Mizoram hian chak tura run an mamawh an umnaah over 43 chhungin run 171 siamin an thi zo va. Vanlalpekhlua Zote-in run 41 siamin siam tam ber a ni a. Thuampui tlangval, Sharma-a’n run 36 (71) thawk bawkin chak tura ngai an vaw chhuak zo ta lo a ni. 

Mizo tlangvalte hi Plate Group-ah final hmain vawi nga khelin vawi li an chak a, final-a an hneh tak loh nen hian group match hnuhnung berah Thawhtanni khan inkhelin run 23-in an lo hneh lo tawh bawk. 

Mizoram hian nomawi hawn thei lo mah se captain Johan-a chu tournament chhunga khel tha ber, Player of the Series-ah thlan a ni a. Ramhlun Venglai tlangval hian vawi ruk a khelhah run 320 vaw chhuakin run siam tam ber a ni a. Meghalaya, Arunachal Pradesh leh Sikkim lakah te half century a siam a. A vawm lamah pawh mi pariat a vawm hlum bawk a, Mizoramin final an luhna kawnga thawhhlawk ber pakhat a ni.

FINAL INKHEL KHAIKHAWMNA:

Meghalaya - 307/7 (50 overs)

Pushkar - 105* (115)

Shavian - 76 (54)

Mizoram - 171/10 (43 overs)

Vanlalpekhlua Zote - 41 (47)

Manish - 3/30 (9 overs)

Run 136-in Meghalaya an chak.