ZALEN, November 13, 2025: Mizo tlangvalte a zawnin vawi thum an chak ta a, final lut turin hmabak pahnih an la neihah vawi khat an chak chiah a tawk ta.

Board of Control for Cricket in India (BCCI) hnuaia association hrang hrangte inelna, Men's U-23 State A Trophy Plate Group inkhel vawi thumnaah Ningani khan Mizoram hian wicket riatin Manipur an sawp a. A hmain Sikkim leh Nagaland an lo hneh tawh bawk.

IS Bindra Cricket Stadium, PCA, Mohali, Punjab-a inkhelah hian thum vawrah Mizoram chakin vawm hmasak an thlang a, Manipur batter-ten bul tan tha viau mah se a Mizo bowler-te hmaah an dingchang tluan thei lo.

Opener Ringku Kangujam-a’n half century vaw chhuakin a bul tanpui, Heishnam Manikanta Singh-a’n run 28 a siam bawk a. Heishnam-a hi Prem Kumar Layak-a’n a vawm thih hnuah mi dang run 10 siam tling pawh an awm zui lo ta va, over 35 chhungin run 135 chauh tlinin an thi zo.

Mizoram tan captain Johan Lalbiakkima’n mi pali vawm hlumin Lalhmangaihzuala leh Nagaland batter-te pawhin an lo ngam loh tawh, Sahil Sharma ten wicket hnih ve ve an la bawk.

Mizoramin hian chak nana an mamawh run hi mi pahnih chauh thiin over 28.1 chhung lekin an tlin a. Opener pahnih, Johan-a (run 40) leh Sharma (run 44) an chet that bakah Sikkim laka half century lo siam tawh, Zemabawk tlangval, Vanlalpekhlua Zote (Tetea) chuan ball 54 a hmachhawnah a tawp thlenga thi lovin run 47 a siam bawk.

Mizo tlangvalte hi Meghalaya nena vawi thum khelha la chak vek awm chhun niin Plate Group-ah hma an hruai dun a. Inrinniah hneh la nei lo, Arunachal Pradesh nen an inkhel leh dawn a, an chak chuan final an lut dawn a. Thawhtanniah Meghalaya hi an la khel leh bawk ang.

INKHEL KHAIKHAWMNA:

Manipur 135/10 (35 overs)

Ringku Kangujam - 53 (40)

Johan Lalbiakkima 4/27 (10 overs)

Mizoram 136/2 (28.1 overs)

Vanlalpekhlua Zote - 47* (54)

Sahil Sharma - 44 (68)

Wicket riatin Mizoram an chak.