Cristiano Ronaldo chuan Lionel Messi nen ‘football chanchin tidanglamtu’ an nih thu a sawi a; mahse, tunah chuan an ‘inelna’ chu a liam ta tih a sawi.

Khawvela footballer ropui ber pahniha chhalte hi Spain-a La Liga-ah Real Madrid leh Barcelona tan khelin an lo inel rei tawh hle thin.

“Khawvel pumah hriat leh zah kan hlawh a, chu chu a pawimawh ber,” tiin Ronaldo chuan a sawi.

Ballon d’Or vawi nga dawng tawh, Ronaldo hi kum 2003 hnua a vawi khat nan kuminah hian a dawng thei tura chhawp chhuah zingah a tel lo va, Messi-a erawh a vawi riat nana dawng leh thei tur zingah a la tel thung.

“Ani’n a kawng a sial a, chutiang bawkin kei pawhin. Ka lo hmuh danah chuan a ti tha hlein ka hria. Chhunzawm zel hi a pawimawh a, chu chuan hriat reng tur pawh a hnutchhiah zel a ni,” tiin kum 38 mi, Saudi Arabia-a Al Nassr tana khel mek, Ronaldo chuan a sawi.

An inelnaah inhuatna a tel leh tel loh zawhna chu, “Cristiano Ronaldo duhtuin Messi-a a huat kher tul ka ti lo va, kan inelna hi chutiang chuan ka thlir lem lo bawk,” a ti.

“Tunah chuan kan inelna pawh a liam tawh a. Kum tam tak hmun (stage) khatah awmin chu chu a lo tawp ta a, thian kan ni chu ka ti lo va; mahse, ei zawnna thuhmun kan ni a, kan inzah tawn em em a ni,” a ti.

Record tam tak siamtu player ropui pahnih hian football-in a ken chawimawina thahnem tak an dawng ve ve tawh.

Ronaldo hi Real Madrid tana goal thun tam ber niin vawi 438 a khelhah goal 451 a thun a. Bernabeu-a kum kua a awm chhungin nomawi 16 a la a, heng zingah hian Champions League pali, La Liga pahnih leh Copa del Rey pahnih a tel.

United States-a Inter Miami tan khel mek, Messi-a pawh hi Barcelona tana goal thun tam ber a ni ve bawk a, vawi 781 khelhah goal 674 a thun.

Kum 36 mi hian nomawi 35 lain heng zingah hian La Liga 10, Champions League pali leh Copa del Rey pasarih a tel.

Ram tana an khelhah Messi hian Argentina chu FIFA World Cup-ah leh Copa America-ah a champion-pui a, Ronaldo hian Portugal chu European Championship leh UEFA Nations League nomawi a lakpui ve bawk.

Player ropui pahnih hi khelmualah vawi 36 an intawng a, a hnuhnung ber chu January thla kha niin Paris Saint-Germain-a Messi a khelh lai a ni a, Ronaldo telna Riyadh Season XI chu 5-4 in an hneh a ni.