Hoffenheim-in an player tha te an khelhtir ang em? 1899 Hoffenheim chuan nizan khan an khelmual, mi 30164 lenna, Simsheim khawpuia inkulh Wirsol Rhein-Neckar-Arena -ah Eintracht Braunschweig chu an mikhual a, vawiin hian Frankfurt atangin New Delhi-ah an rawn thlawk lut ang. Bundesliga lama an match hnuhnungber result hi kan hre hman lo a, chak loh chuan sawmpathumna ni thei an ni a, an chak anih chuan an dinhmun ngai pakuana niin season an khar ang. Mizoram-ah hian German club tha te hian an player tha te an rawn khelhtir ang em le. Hriat tawh angin 1899 Hoffenheim hian tun season an kharna ni turin India ramah kar khat an rawn cham dawn a, he ramah hian an theih ang angin tanpuina hna te an rawn thawk dawn. He club hian an sponsor SAP hmalaknain pro-ject thar pali an nei a, chung zingah chuan India ram rawn tlawh hi a tel a, Global United FC chuan 'Tour of India' atan hian he club hi a chhawmdawl ve bawk.Calcutta, Goa leh Aizawl-ah te hun an hmanga dawn a a, naupang te inkhelh zirtirin club thenkhat te an tlawh dawn. Hoffenheim hian India rama an rawn kal tur chungchang pawh hi an tarlang a, Aizawla an inkhelh hun tur te leh Mizoram XI an hmachhawn tur te thlengin an ziak. Mahse, eng ang team nge an rawn chhawpchhuah dawn tih erawh an sawi lang lo a, an sporting director tawngkam atang chuan an player naupang lam an khelhtir duh hmel. Hoffenheim hian a tir atangin an player thenkhat, ram tana World Cup khel tur te leh player inhliam te rawn hruai an tum loh thu an sawi a, tun tuma Mizoram nen an inkhelh turah hian player naupang zawk an rawn khelhtir mai anga em tih chu zawhna awm thei a ni a, an website a thuziak an tarlanah hian sporting director Alexander Rosen chuan, "Bundesliga tana international ambassador ni tura kan fehchhuak thei tur hi kan lawm a, chumai bakah a takin kan hmachhawp tih ngei ngai leh tul em em te kan ti thei dawn a ni. Kan kalphung leh kan nitin nunphung thlirin, kan squad-a player naupang zawk te tan tawnhriat hlu bik a ni ngei ang," a ti. A enga pawh chu ni se Bundesliga club tha, German champion Bayern Munich pawh an muala va inhnehtawkpui thei te hian eng player pawh rawn khelhtir se, keini tan hi chuan tawh an khirh dawn tih a chiang a, player tha lo deuh an rawn dah lut a nih pawhin kan mualphona a nasa lo zawk tura ngai hmiah ang.