Aizawl: Ni za inhlawhna tia hriat lar Mahatma Gandhi National Rural Employment Guarantee Scheme hnuaiah April atanga August thla tawp thleng khan Aizawl district ah ni 48 inhlawh a ni tawh.

Zalen palai thudawn danin kumin financial year chhunga inhlawhna atang hian hlawh ah Rs. 27,12,22,987 hman a ni tawh a, chhinchhiahna atanga a lan danin Aizawl district ah job card nei mi 26970 an awm mek. MGNREGS hnuaiah hian Aizawl district bikah April, May leh June thla khan ni 14 theuh inhlawh a ni a, July leh August thla ah ni 3 ve ve inhlawh a ni bawk.

Aizawl district chhunga RD Block 5 awm zingah Thingsulthliah RD Block ah job card nei awm tam berin 7586 an awm a, a dawttu Darlawn RD Block hnuaiah 6897, Tlangnuam RD Block ah 5152, Aibawk ah 4536 leh Phullen RD Block hnuaiah 2826 te an awm a ni.