Aizawl: Kum 2014-2015 chhung khan Mizoram Health Care Scheme atangin damlo te inenkawlna senso Rs. 123,532,722/- pekchhuah a ni a, heng zinga a chanve deuhthawh Rs. 60,879,793/- hi Hepatitis C leh Cancer enkawlna senso a ni. Kum kalta 2014-2015 chhung khan Health Department chuan Mizoram Health Care Scheme hnuaiah MR Bill 8209 dawngin heng zingah 365 hnawl a ni a, bill pawm 7843 atanga damlo inenkawlna senso an peklet chu Rs.123,532,722/- a tling a. RSBY hnuaiah bill 29039 dawngin 1513 chu hnawl a ni a, bill pawm 23359 atangin Rs. 124,364,182/- chu pekchhuah a ni tawh a, tunah hian bill 3607 chu buaipui mekin an buaipui zat hi Rs. 20,102,720/- a tling. MHCS bikah hian Hepatitis C ah Rs. 37,027,363/- pekchhuah a ni a, Cancer damlo inenkawlna atan Rs. 25,609,621/- pekchhuah a ni bawk. MHCS dilna lut 7262 (Rs. 89,513,622/-) hi Mizoram chhunga inenkawlna senso niin a dang 581 (Rs.34,019,100/) hi Mizoram pawna inenkawlna senso a ni. Health Care Society thawktute chuan MR bill an dawn te chu ni 21 chhungin an peihfel hman tih sawiin mahse chegue sign tu leh thil dang tih ngai a awm vangin an duh angin an pechhuak hma theilo tih an sawi a. Kum 2014-15 sum pawh hi tunkar chhung khan an peihfel thei chauh a, a chhan Zalen zawhna chhangin MHCS thawktute chuan, “March 2015 tawp thlenga damlo te inenkawlna hi bill theih a ni a, damlo thenkhat damdawiin ah enkawl mek te nghah an ngai a, thenkhat chu May thla ah te damdawiin atanga chhuah tir chauh an ni a, heng mite hi nghah an ngaih avangin kan peih har a ni," tiin an sawi. MHCS chuan Finance department lamin sum pekchhuah kawngah harsatna an siamlo tih sawiin,"Finance lam chuan rang takin an peih a, mahse bill nghah kan neih bakah kan department lamah thawktute damlohna avangin duh angin kan peih hma thei lo a ni," an ti bawk. MHCS ah hian nikum chhung khan BPL chhungkua 50020 leh APL chhungkua 16017 an inziaklut a, kumin 2015-2016 atan enrollment hi tih leh mek a ni a, June 2015 thleng atan hun hawn a niin district atanga a la luh kimloh avangin enrollment ti zat chiah hi hriattheih a la ni lo a ni. Health Care scheme ah hian category 3 awmin Rs.500 a enrollment ti ten nuai khat, Rs.750 in nuai 2 leh Rs.1000 a enrollment ti in nuai 3 thleng an bill thei a ni.