August 21, 2023; MHIP Gen Hqrs chuan thuchhuah siamin, mitinte social media hmang fimkhur turin an ngen.

Thuchhuah an siam ah social media a thalo zawnga hman vanga hrem tawk tunhnaiah kan awm fo ta chu MHIP Gen. Hqrs. chuan pawi a ti hle tih tarlangin, IT Act 67A in a sawi angin Sex Video/thlalak thehdarh kawngah, account neitu in ama duhthu ngeia a thehdarh emaw, mi Sex Video/thlalak lo thehdarh sak emaw chu vawi khatnaah kum 5 thleng lungin tan leh cheng nuai 10 thleng chawi tir theih a ni a, hrem nawn a nih chuan kum 7 lungin tan leh cheng nuai 10 thleng chawi tir theih a ni. Khawvel thiamna hmangin kan Police ten rang takin an chhuichhuak thei zel tawh tih tarlang bawkin, mitin te Social media kan hman danah fimkhur turin an ngen.

Naupang chunga pawngsual, kutthlak leh khuaikhemna thleng kan hre ta zauh zauh tih tarlang bawkin, pawi khawihtu chu kumtling lo pawh nise Juvenile Justice Act 2015 hmangin hrem theih a ni a, kum tling a nih chuan POCSO Act, 2012 hmangin kum tam tak lungin tan leh pawisa chawi tir theih a ni tih an tarlang a, hemi kawngah pawh hian mipuite fimkhur turin an chah bawk.