Turkey leh Syria hmarthlang lama lirnghing avanga thi chu mi 23,700 an tling ta tih thuneitute chuan an sawi a, kum 20 zet chhunga helai bawra lirnghinga thi an tam berna a tling ta hial.

Thawhtannia magnitute 7.8-a na leh a hnua aftershock eng emaw zat thlenga thi zat hian kum 1999-a Turkey hmarthang lama mi 17,000 chuang thihna chu a khum ta a ni.

Turkish President Recep Tayyip Erdogan chuan Zirtawppnia Adiyaman province a tlawhnaah sorkar chuan tun hma aiin chhiat an tawh chu a hmachhawn tha tawh zawk tih a sawi.

“Khawvela search & rescue team lian ber kan nei mek a, mi zawn hna erawh kan duh anga chakin kalpui theih a ni lo,” a ti.

Rescue team-te hian ni a liam tam deuh tawh avangin dama chhanchhuah tur an awm beiseina an nei tlem sawt hle tih an sawi.

Beiseina nei tlem zel mah se lir a nghin atanga darkar 110 zet a liam hnuah in chim kar atangin mipa pakhat chu damin an la chhuak tih an sawi bawk.

Chhungkaw tam tak chu chhungkua mang vek te, chhung rual zinga pakhat chauh dam chhuak rihte pawh an awm a ni.

Turkey-a eptu hruaitu, Kemal Kilicdaroglu chuan sorkar chetlak a muang niin a sawi.

“Lirnghing kha a ni a; mahse, thawhhona tha, ruahmanna tha leh inpekna tak tak awm lovin hmachhawn a ni,” tiin Kilicdaroglu chuan a sawi.

Puihna thil leh hmanruate a thleng muang a, chhanchhuah hna tan a muang bawk nia sawiin mi tam tak an thinrim a. Hei hian Erdogan-a’n May 14-a inthlan tura tlin nawn leh a tumna a nghawng theih hial rin a ni a; mahse, inthlan hi chhiatna avanga sawn sawi rik mek a ni.

Turkey-ah 20,213; Syria-ah 3500+

Turkey-ah hian Zirtawpni zan khan lirnghing avanga thi chu mi 20,213 an ni tawh tih an ram health minister chuan a sawi a. Syria-ah mi 3,500 chuang an ni tawh bawk a, tam takin chim leh thil chhe karah an la tang bawk.

Syria-ah hian Zirtawpni vek khan sorkar chuan kum 12 zet tual chhung indona avanga an buai tawhna hmuna ramri atanga puihna lak luh phalna a tichhuak a, hei hian rang zawkin puih ngai mi maktaduai telte hnenah puihna a thlen ran phah dawn a ni.

World Food Programme chuan a hma lawkin Syria hmarthlang lam, helho awp lai hmunah chuan chhanchhuah leh puihna thawhna hmun tlakchham niin thil a buaithlak tak zet tih a puang hman tawh a ni.

Ram ram tak atanga kalkhawm chhanchhuah hna thawktute chuan chhun zan zawmin, khaw vawt tak hnuaiah hna an thawk mek a. A khât tawkin an ngawi a, hei hi hna an thawhna lai hmunah chuan mihring thawm a awm em tih an ngaithla thin a ni.

Syria-ah chuan White Helmet tia an sawi pawl chuan kut lawngin in chim an hai a, hun a liam zel avangin dama lak chhuah tur an vân viau tawh an ring.