July 6, 2022; Kumin bul lam atanga Aizawl Zoological park a dah Sakei chu bawngsa (fresh meat) pek thin a ni a, hemi bakah hian kelsa leh bawng thin tlem a zawng pek tel a nih theihna turin hmalak mek a ni. Aizawl sahuan hi June thla liam ta khan mi 3,647 in an tlawh.

ZALEN thudawn danin, sahuan a sa hring ei ho chi hrim hrim chu kar khat ah ni 6 chaw pek thin an ni a, ni 1 nghei tir thin an ni a, hemi vang hian sakei pawh Pathianni a piangin nghei tir thin a ni. Sakei chaw atan fresh meat (bawngsa) zel pek a ni a, nitin sachaw supplier in a fresh zel a dah thin.

Departmental Purchase Advisory Board (DPAB) approved rate awmsa ah bawngsa chauh a tel a, hetihlai hian kelsa leh bawng thin tlem pe tel thin tura tih an ni a, hemi vang hian kelsa leh bawng thin tlem a zawng pek dilna sawrkarah thlen niin, sawrkar atangin tender koh phalna hmuh a ni tawh a, tender koh a, DPAB in an pawm hnu ah kelsa leh bawng thin tlem a zawng pek thin a ni ang.

Hetihlai hian fur a nih chhoh vangte, oil harsatna thleng mek vangte in June thla chhung khan Aizawl sahuan tlawhtu mi 3,647 awmin, thla dang aiin an tlahniam deuh a, Sahuan luh man (entry fee) te, parking fee leh camera fee atangte a sum an hmuh zawng zawng chu Rs 68,770/- a ni. Tun dinhmuna Aizawl sahuan a ramsa awm zawng zawng chu 625 a ni