Aizawl November 22, 2022 : PC Party president Vanlalruata chuan, tun hnaia sawrkar lai MNF leh eptu party Congress ten Mizoram leiba zat an inhnial chungchangah mipuiin thu dik kan hriat pawimawh a ti a, 'Nausen piang hlim pawh huamin mi pakhatin ₹96,417.27 zel ba ang kan ni,' a ti.

Ruata chuan, India hmarchhak state zingah state te ber Sikkim dawta leiba ngah kan ni a. Sikkim hian bâ ngah hle angin lang mah se, hmasawnna ruhrel tha siam nan an hman bakah leiba rulh leh theihna tur infrastructure an neih phah thung. Keini erawh chuan hmasawnna ruhrel rotling leh leiba rulh theihna tur lam kan hawi lem loh avangin insawi thlamuan nana hman chi a ni loh thu a sawi.

PC Party president chuan, "2022 hian Mizoramah mihring nuai 12, 27,000 vel awm tura hisap niin kan leiba zat tur awm hi ₹ 11,830.40 vbc a ni dawn a, chu chu a lu nunga chhutin mi pakhatin ₹ 96,417.27 zel ba ang kan ni dawn. Budget Bu-ah, 2020-2021 kumah khan leiba zat BE: 87,503.00 lakhs niin RE: 1,88,044.11 lakhs niin 114.90% zetin a pung a. Actual-ah 1,59,522.74 lakhs daih niin 82.33%-in a pung. 2021-2022 kumah BE: 48,945.82 lakhs leh RE: 4,27,775.82 lakhs niin Actual erawh a la hriat loh a, 773.97%-in a pung," a ti.

"Tunah hian leiba thangah kan âwk tawh a, nakum 2023-ah inthlanpui kan hmachhawn dawn a, chuta sawrkarna siamtu chu tu pawh ni se tun aṭanga leiba thang ata kan chhuah theih dan tur ngaihtuah a ruahmanna siam ve turin political party zawng zawng ka ngen a ni," Ruata chuan a ti bawk.