Mahmuaka Chhakchhuak

Pathianin khawvela nang leh kei min din chhan hi tihpalh thila din ni loin chhan neia min din a ni tih hi kan pawm a tha. Chu chhan nei tih tak chu kan ngaihtuah ngai loh vang erawh chuan keimahnia theihna awm pawh hi haichhuah leh hman kan tum ngai thin lo a, kum rei tak chhung, a thente phei chu an damchhung hun pawh a ni zawk mai thei a, hre loin an lo liam pui thin bawk.

Kum 10 mi vel ka nih laia kan zirtirtuin school nilo, hmun pakhata a sawi ka la hriat reng chu ‘Pu Xyz hi chu mistiri hna hi i thiam tehlul nen hian nangmah ber hian thiam i inti tlat lo hi a tha lo a ni’ a ti a. Vawiin thleng hian Pu Xyz hi midangin thiam an tih ang chuan mistiri hna chu chhunzawm loin upa tak a nih thlengin a thiamna chu a hmang tangkai ta lo a, a pawi hle mai. Mistiri hmanrua leh eng eng emawte chu a nei ve tak nain midang tana tangkai turin a hmang ngai lo a, ama tana hlawk tur phei chuan a hmang ngai miah lo hial awm e. Chutianga thiamna up beh chu a pawi hle a, ama insitna emaw inrintawk lohna vang emaw pawh chu a ni mai thei nain zawi muang pawhin a thiamna chu han hmang chhunzawm zel zawk ta sela chuan khaw khat pa lar a nih loh pawhin veng chhungah chuan a hming a lar phah ngeiin a rinawm a. Chu ai mahin amah ngei pawh chuan sum leh pai a lo hmuh theih phahin sum hai luhna tha tak pawh chu a lo ni mai thei bawkin midang tan tangkai takin a thiamna chu a hman theih pawh a rinawm.

Mahni insitna leh inkiltawih­na thinlung hi kan nei awlsam viau hlawm a, nang leh kei pawh hian chu dinhmunah chuan rei tak chhung kan lo tang tawhin a thente hi chu vawiin thleng pawh hian kan la tang mai thei bawk e. Talchhuah a tha tih pawh hre reng chungin talchhuah har kan lo ti a nih pawhin tun atang chuan Pathian­in mi pangngai mai niloa mi bik taka a din kan nihna hi kan hriat thar a ngai hle mai. Kum tam tak liam tawh atanga vawiin thleng hian khawvelah mi ropui tak tak an lo chhuak tawhin an lo la chhuak mek zel bawk a, chungte nen chuan Pathianin angkhat leh thuhmun veka siam leh din kan ni. Anni ang bawkin kan theihna hi kan ring ngam tur a ni a, anni ang bawkin mi ropui kan ni ve thei tih hi kan pawm ngam tur a ni. Chuti ni lo sela chuan khawvelah hian mi chungchuang hi an awm thei ngai lo ang a, mahni thiamna leh theihna pawh hre lo hian mi ropui tak tak tur hi thlanmualah vui liamin kan awm thei a ni.

Mitdel, khaw hmu lo kan tihte hi engmah dang ti thei lo tura ngaih ngawt tur a ni lo a, mahni ina tawm reng tura beisei ngawt tur pawh a ni hek lo. Mitdel Zawlnei Tiresias, Greek thawnthua mi langsar tak chuan Sphinx chu a thufing a chinfel sak a, a hlawhtling hle. Chu chuan Thebes khawpui chu a hrehawm tawrhna atangin a chhuah zalen thei ta a ni. Oedipus chanchina lungchhiatthlak tak lo thleng tur pawh a hrilhlawk dik bawk a. Helen Keller pawh hi kan hre lar viauin a rinawm a, beng­ngawng leh mitdelna chu inhneh tir mai loin lehkhabu ziaktu lar a nih mai bakah Advocate a ni bawk a. Chutiang bawkin naupan lai atanga mitdel Louis Braille pawh Braille system siam chhuaktu niin chu a thilsiam chhuah hmang chuan mitdelte’n lehkha an lo chhiar theih phah ta a. Mizo zingah pawh mitdel chunga IAS nih tum tlat kan neih pakhat chu Vahniehchhi (Vava) hi niin tunah hian MCS result a nghak mek a, a beiseina hi a hlawhtlin ngei a duhsak-awm hle.

West Saizawh khuaa Awmhar Cabin nghaktu V. Kungtea ngei pawh hi a chanchin sawi tam pawh a ngai kher awm lo e, a lehkhabu Awmhar Cabin hi han chhiar ve la, a chhuanawm zia i hriat theih mai a rinawm. A hmel en chuan hetiang lehkhabu tha tak ziak thei hmel pawh pu lo tura ngaih awm tak a nih laiin mi tam takin an theih loh leh an tluk loh tur lehkhabu tha tak a ziak thei tlat mai hi a ropui a sin. Zep rual lohin han sawi ta ila, V. Kungtea vang hian alawm ka dam hi chuan lehkha ziah hram hram ka tum thin a, lehkha chhiar te hi peih lo chung chung pawha ka tih thin ni. A dinhmuna ding hi mi tam takte chu an duat no ngeiin a rinawm a, nimahsela a ni hi chuan chutianga pangchan leh duat no ngai hmel pu hauh loin fiamthu ala thawh bawrh bawrh thei a, nula ala fiam nui uar uar thei zel hi amaha amah hi a ropui ngawt mai. 

Zaithiam YoungFella hi thangthar zingah hre lo pawh kan awm kher lo ang. Tunah kum 23 chauh ala ni nain hetiang khawpa Zoram mipui hriat a hlawh theihna hi mi tam tak tan chuan thil theih loh tur hial a ni ang. A nu leh a pa lamah ka theih tawka thui ka chhui pawhin ‘zai mi’ tia sawi tur hi an awmin ka hre lo a. A pa nen phei hi chuan naupan laiin kan inkawm fo a, sava veh te chu hrat hle mahsela a zaithiam hi ka hre ngai lo. Chutiang karah chuan Zoram khawvel hriat tham khawpin an fapa chu a rawn lar chhuak ta tlat mai si a, an fapaah hian Pathianin Mi bik a nihna lanchhuah tir turin theih­na a pe tih a chiang reng. Kum 2019 – 2023 chhunga Lengzem hlasa zinga, mimala LPS Top chart-a pakhatna hauh ngun ber a nihnate, kum 2021-a Best Rap performance of the Year a nihnate, kum 2022-a Lelte Award, Vulmawi Award leh Rimawi Award a dawnnate leh Mizo hit chart a neihnaa pakhat dinhmun ala lak kim vek theihnate, Mizo zai Youtube-a dah tawh zinga thlirtu million viewer nei rang ber a nihna zawng zawngte hi Pathianin amaha Mi bik a nihna haichhuak tura theih­na a pek vang a ni.

Mi bik i nihna i hre tawh em, ila hre rih lo a nih pawhin ka dem hauh lo che a, Mi bik i nihna hre tur erawh chuan i theihna tipung turin thu mai mai lo turin ka duh a che. Chawhmeh zuar i ni em, Lehkhabu zuar i ni em, Eichawp zuar i ni zawk nge, Pheikhawk thui emaw Office-a hnathawk pawh i ni mai thei e, i thiltihnaah chuan ti mai mai loin i theihtawp chhuah ang che. Nangmaha theihna haichhuak turin thahnemngai takin thawk la, nangmaha Mi bik i nihna chu midang hmuh theih turin lantir ngei ang che. I kawng daltu apiang chu paih kian tum la, i mit timimtu an awm a nih pawhin an lakah chuan i mit hup mai thin la, i kawng zawh laiah chuan nangmah chauh pawhin kal hram hram zel turin nangmah leh nangmah infuih fo thin bawk la. Springfield khuaa Thingkittu fapa ve mai siin US President nih a tumna kawng kha vawiin thleng hian thawnthu ngaih­nawm ala ni reng a, vawi tam tak a tluk hnua Lincoln-a’n hlawhtlinna tlangchhip a thlen dan kha sawi nawn fo a nuam thin. Harsatna kara mi huaisen che vel hi thawnthu ngaihnawm lai ber a ni zel a, amah pui theitu tur zawng zawngin awmzia a awm tawh loh hnua amaha theihna lo lang chhuak chu mi thinlung hneh tur ber a ni thin.   

Nangmah ngei pawh khan Mi pangngai ni mai loa Mi bik i nihna inhre turin thawhrimna nen hmalam panin i ke chu pen rawh le.