Aizawl: Food, Civil Supplies & Consumer Affairs Minister K.Lalrinliana chuan nimin khan Zuangtui Godown atangin miretheite hnena man tlawm zawka chini hralhtur phurtu motor pahnih a vailiam.

Supply Minister K.Lalrinliana chuan, “Retailer te kaltlanga supply department in chini man tlawm zawka a hralh thin kha hun engemaw chen tihtawp anih hnu ah tunah bul kan tan tha leh thei ta hi thil lawmawm tak a ni a. Mi rethei te’n chini an mamawh ang te man tlawm zawka an lei theih hi Chief Minister Zoramthanga ngaihpawi mawh ber pakhat anih bakah sawrkar intiamna a ni bawk,” a ti.

FCS&CA Minister chuan sawrkar thar din anih veleh chini sem dan tur ruahmanna siamin theihtawp chhuah a hmalak nghal a ni tiin hetih lai hian sawrkar laipui atanga Mizoram State-in chini sem theihna allocation a neih chu AAY beneficiary te tan, thla khat a chhungkaw khatin kg 1 zel an dawn theihna chauh a nih hnuah leh budget engmah hman tur a la awm bawk si loh avangin AAY beneficiary te tana awm hi a dawngtur dik takte hnenah sem phawt tha bera hriat anih avangin ruahmanna siam a ni ta niin a sawi bawk.

Minister hian thu a sawi zawh hian Lungdai SDC, Kawnpui SC, Kolasib PDC, Vairengte SDC leh Bairabi SDC a dah tur chini quintal 72.50 phurtu truck leh Aibawk PDC a dah tur quintal 25 phurtu truck te a vailiam nghal a ni. Minister hian GMG Zuangtui Godown tlawh nghalin Godown chung ruahsur a tui far thin chu karleh Thawhtanni a siamtha nghal turin Department hotute a hrilh nghal a ni.

Mizoram sawrkar chuan heng chini sem turte supply tur hian MIZOFED a thlang a, March thla khan supply order pawh tihchhuah vek tawh ani a, MP inthlan puan a nih avangin Model Code of Conduct puan ani zui a, hei vang hian chini sem hi kalpui nghal theih ani ta lova, inthlan zawh fel anih veleh chini sem theihna tur hian hmalak nghal niin tunah hian AAY chhungkuate hnenah chini thla thum quota (January - March, 2019) sem theih tura peihfel a ni ta a ni. AAY Scheme hnuaiah hian beneficiary chhungkua 26100 an awm a, anmahni bialtu retailer te hnen atang chini hi kg 1 Rs 24 in an lei thei ang.

AAY beneficiary chini man tlawma lei thei hi DCSO Aizawl West hnuaiah 3269, DCSO Aizawl East hnuaiah 3815, DCSO Champhai hnuaiah 3558, DCSO Kolasib hnuaiah 2322, DCSO Lawngtlai hnuaiah 2220, DCSO Lunglei hnuaiah 4056, DCSO Mamit hnuaiah 1878, DCSO Siaha hnuaiah 2285, DCSO Serchhip hnuaiah 1958 an awm.

Govt. of India, Ministry of Consumer Affairs, Food & Public Distribution hnuaia End-to-End Computerization of TPDS Operations Scheme huamchhunga Component-I zinga mi Supply Chain Automation (application of FEAST Software) chu Mizoramah pawh bultan a ni tawh a, a hmasa ber atân FCI - Food Storage Depot (FSD), Tanhril leh GMG Zuangtui (Supply Deptt. PDC lian ber) chu he FEAST Software hmang hian thlun zawm a ni.

Minister hi Serlui bialtu MLA Lalrinsanga Ralte, Aizawl North-III bialtu MLA C.Lalmuanpuia, MIZOFED Chairman K.Laldawngliana, Supply Department Commissioner & Secretary L.Rochungnuga, Supply Director Dr. Lalhriatzuali Ralte ten an tawiawm a ni.