Aizawl November 1, 2022 : Mizoram Pradesh Youth Congress Committee (MPYCC) President Dr. Lalmalsawma Nghaka chuan, Kum 2023 Inthlanah sawrkar tha siam turin Congress party a inbuatsaih mek a, mi state Chief Minister awta kan awm tawh lohna turin sum enkawl thiam leh eirukna laka mi fihlim Lalsawta Mizoram mipuiten kan Chief Minister tir ngei a ngai a ni, a ti.

Mizoram Pradesh Congress Committee (MPCC) Campaign Committee programme anga Aizawl khawpui chhunga Congress Unit tlawhchhuah programme hman mekah nizan khan Chhinga Veng Unit pathum a tlawhnaah Dr. Lalmalsawma chuan a sawi. "Tun dinhmunah kan ramin a mamawh ber chu thusawi thiam ni lovin hnathawk thiam a ni. Enchhin ve ngai tawh lo hruaitu tha hmang hian kan ram sum dinhmun harsatna khurpui ata chhanchhuah hna hi thawh a tul tawh takzet a ni," a ti.

Manifesto chungchang sawiin, MPYCC President chuan, "Congress Party Manifesto No. 1 (Tang Puihna) hi ram siam tak tak tumna Manifesto a ni. Taimakna leh tumruhna kawng kan zawh tlan theih nan a duan a ni. Mizoram mipuite khawvel changkang zel el pha mai ni lo, khawvel changkang chhoh zelnaa hma hruai ve thei tura kal kawng kan insialpuina tur a ni. Sawrkar leh mipuite tang tlangin ram nuam leh thangduang kan nih theihna tura kan in lawm tawnna tur thuthlung a ni, a ti bawk.

Congress party chungchangah Dr. Mala chuan, "Congress-in kan ti ang kan tihah kan dingnghet tlat thin. Manifesto-a kan tarlan te hi chu enchhin chawp ngai lovin kan ti thei a ni. Congress hi a chhelai siamtha thin party kan ni a. Tuirial Hydel Project MNF sawrkar-in a sawp chhiat vek te, Falkawn Referal Hospital tlu chhe vek tawh te pawh mipuite tan a ni tih kan chian em avangin harsatna karah kan tungding leh a ni. Vawiina kan ram sum dinhmun chhe ta em em te pawh hi Congress party bawk lo chu rawn siam tha thei an awm lo. Sawrkar ngawr ngawr ni lo, sawrkar tha mipuite tan buatsaih kan tum mek a, chu sawrkar tha-ah chuan MLA/Minister te tan hausak thur thurna a awm thei lovang. Mipui rawng an bawlnaah channa tam tak a awm zawk ang, mahse kan ram mipuite tan erawh an chanvo diktak hmasawnna tur a awm thung ang, a ti.