Aizawl June 13, 2024 : Ramhlun Venglai Hall Demand Committee te huaihawtin Thawhlehni zan khan Ramhlun Indoor Stadium Conference Hall-ah vantlang inkhawm koh a ni a, He hunah hian Mizoram sawrkarin Ramhlun Venglai tana Hall hmun tur a lo pek tawh chu chinfel thuai a nih theihna turin resolution an passed. Hetihlai hian pawl pali - MIA, MCCI, MIOA leh MISA te chuan he ram hi Ramhlun Venglai pek an remti lo.

Ramhlun Venglai-a DIC Complex-a Rural Industrial Development Centre (RIDC) hmun Ramhlun Venglai Community Hall sakna atana pek a ni hi Mizoram Industries Association (MIA) Mizoram Chamber of Commerce & Industry (MCCI) leh Mizoram Industries Owner Association (MIOA) te chuan an duhlo tak zet tih an lo sawi tawh a, August 31, 2023 (Ningani)-a khatihlaia Chief Minister hova RIDC gate leh building kalhna tala (Lock) chhu chhia a Department hotute hriattir hmasa lova an lut chu Mizorama thilsiam lama eizawngtute ngaihnepna leh palzutna nia an hriat thu an lo sawi tawh a ni.

Mizoram Industries Service Association (MISA) pawhin October 11, 2024 khan thuchhuah siamin August 31, 2023 (Ningani)-a Chief Minister hova RIDC gate leh building kalhna tihchhiah a ni chu an hriatthiam loh thu leh Commerce & Industries Department leh Mizorama thilsiamna lama eizawngtute ngaihnepna leh palzutnaah MISA chuan an ngaih thu thuchhuah an siamah an lo tarlang tawh a, Mizoram sawrkarin Industry ram tam tak a lo chhuhsak tawh chu an ui thu an lo sawi tawh bawk.

Ramhlun Venglai Hall Demand Committee ten resolution an passed chu :

Mizoram sawrkarin Ramhlun Venglai Hall sakna tur hmun min mek (vide Notification No. D.11028/1/2023-GAD dt 5th October, 2023) hi a rang thei ang berin Land Lease siamfel ni rawh se.

June Ni 30, 2024 hmain Commerce & Industries Department nen Aggrement siam fel ngei ni rawh se. Hemi hunchhunga tihfel a nihloh chuan 1st July, 2024 atangin DIC Staff te Office kal tur Ramhlun Venglai mipuiin kan dang ang.

Kan hmalakna hi a la hlawhtlinglo anih chuan sawrkarin ram min pek chhungah hian mipuiin a tul angin hma kan la ang.

Heng resolution an siam te hi Vengchhung mipui kalkhawm te aiawhin, Local Council, MUP, MHIP, YMA President theuh ten an hming an sign hnan a ni.