Hun eng emaw chen a ngawih vang vang hnuah, RED FM chungchanga an puhnate chu Michael M Sailo chuan a rawn chhang let ve ta a. "Kar tam ngawih ka chuh hnuah, a nihna dik tak hi tarlan ve thain ka hria," a ti.   August ni 16, 2014 khan Music Domain Mizoram (MDM) chuan Aizawl Press Club-ah press conference an nei a, hemi tum hian MDM chuan RED FM hnenah MZI chuan hla 300 an hralh a, he'ng an hla hralhna sum te hi zaithiam pahnih pathum vel bakin pawisa an dawng lo niin an sawi a. Hemi chungchangah Michael M Sailo hming a rawn langin, a ni pawhin an puhna te chu a rawn chhang let ve ta a ni. Michael-a chuan RED FM hian an kalphung hrim hrimah Mizo hla 'play' an tum loh thu sawiin, hla lei phei chu an tum hek lo niin a sawi bawk. Mahse, zaimite tana hlawhna tur zawk ngaihtuahin, rei fe inbiakna an neih hnuah a hmin thei ta chauh niin a sawi a, "Anmahni an hmanhmawh avangin ka duhsak zawng leh thiam ka tih artiste tlem hla ka khawn khawm a, Mapuii Fanai leh John Mawitea ka phone a, an hla 100 vel bawr an rawn dah bawk a, chu'ng chu Red FM ah kan dah chho ta a ni," tiin a hmalakna te a sawi a. A hla man tur chungchang pawh ti hian a sawi a, "A hla man tur pawh hi rei fe kan inhnial hnuah hla pakhatah Rs. 900 ang zelin kan ti thlu ta," tia sawiin, Mizo Zaimi Inzawmkhawm (MZI)-a an hruaitu zing ami Lalhungchhungi Pachuau a biak thu leh, MZI hmalakna angin kal se tia an insiam rem tak thu a sawi bawk. MDM lamah an artiste pawisa dawng lo an awm thu an sawi chungchang pawh rawn chhangin, "MDM President ngei hi ka phone a. ‘Kan artiste la dawng lo in tih ho hi a list rawn siam ula, ka mawhphurhna a nih avangin ka lo chingfel ang e,' ka ti a. A ni pawh chuan, 'A tha alawm' tiin kan inbe fel a," tia sawiin, an inbiak fel hnuah erawh tun thlengin an la reh thu a sawi thung. Hetih mek lai hian, social media lamah, 'Pawisa ei eu... nuai khat ei....hla khatah Rs. 200 zel a le, leh adt.' tiin MDM lam hian min lo than tir tih a hriat chhuah leh zel thu a sawi a ni. Michael-a chuan hmingchhe deuha an chhuah duna chhan tur a ngaihtuah hnuah, a hriatthiam danah chuan MDM te mil loh ber pahnih — MZI leh Joy-a (LPS) te a thawhpui vang ni bera a hriat thu pawh a sawi fak fak a. "Zaimite tana hma la theuh theuh si hi, an hmalakna a tel loh avangin an vui ni berin ka hria," a ti a. "A tira zaimite tana hlawhna ngaihtuaha hma la si kha, pamham lutuk, hlemhle tak, sum eiruk tumah min chhuah chu a ni ta der mai," tiin a lungawi lem loh thu a sawi bawk.