Aizawl: Mizoram Police, Social Welfare Department leh NGO pakhat, Community Health Action Network (CHAN) tang kawpte chuan mihring hmanga sumdawnna (human trafficking) nena inkaihhnawihna nei nia rin Nepali hmeichhe 23-te chu Nepal sawrkar thuneitute kutah an hlan.
Zalen thudawn danin heng hmeichhiate hi kumtling tawh vek an ni a, thenkhat hi chu Middle east ramahte pawh lo awm tawh niin Delhi-ah hruai an nih hnuin Guwahati panpui an ni a, hemi hnu hian Aizawlah kalpuiin Zokhawthar atangin Myanmar ram luh an tum a. Police leh thuneitu ten ringhlelin an man a, Social Welfare Department enkawl home hrang hrangah dah an niin ni 7.5.2019 (Thawhleh) zan khan venhimna hnuaiah hruaichhuah an ni a, ni 9.5.2019 (Ningani) zan khan Nepal sawrkar thuneitute hnenah hlan an ni. Nepal thuneitute hnena an hlan takte hian hnam dang tawng an thiam loh bakah pawisa pawh an nei lo nia thudawn a ni.
Mizoram Police hotute chuan tuna an thawnkir tak Nepali-te hi a huhoa lo kal ni lovin group hrang hranga lokal an ni tih Zalen palai an hrilh a. He thil kaihhnawihah hian thubuai ziak lutin an chhui zui mek tih an sawi a. Human trafficking case-ah hian tun hnai deuh khan Nepali mi pakhat Bal Bahadur chu an lo man tawh bawk. Tun hnaia eng emaw case neuh neuh a awm vang hian Mizoram Police-te chuan tun kar leh kar kalta lam khan ngawrh lehzualin ILP enfiah hna an thawk a, mi 100 chuang manin heng mite hi thawn haw an ni.
Zalen thudawnna tarlan danin tun hnaiah mi thenkhatin Mizoram chu mihring hmanga sumdawnna kalkawngah an hmang nasa hle a. Tun hnaia thawnkir tak Nepali-te pawh tunhma chuan Moreh (Manipur) atangin Myanmar luhpui thin an ni a; mahse, sawrkar a khauh hnuah tih dan dang dapin Delhi-ah an hruai phawt hnuah Mizoram panpuiin heta tang hian Zokhawthar kaltlangin Myanmar-ah luhpui leh an ni a. Hnathawh tur tha tak tak tawktarhin Myanmar an thlen hnu hian passport an siamsak emaw an leisak thin a, hmun hrang hrangah hnathawk turin an thawn darh leh thin a ni.

Vairengte Police Chekgate Duty te chuan April ni 24,2019 khan Rohingya Muslim hmeichhia 8, document engmah nei loa Mizoram rawn lut tur an man a, Muslim hmeichhia 8 te hian Bangladesh Sabulara hmuna Kutupalong Refugee camp-a awm an niin kum 22 leh kum 18 inkarte an ni. Heng mite hi Social Welfare Department enkawl home ah dah an ni a, thawn let dan ngaihtuah mek a ni.
May 5, 2019 (Pathianni) khan YMA leh Police tangkawp chuan Edenthar venga Denghliri inah kumtlinglo nia hriat hmeichhe 8 leh mipa 4, Myanmar lama hruai tur an man a. Heng an mi mante hi Protective Home leh Children Home-ah dah lailawk an ni.