Milarte hi an lan danah chuan nun awhawm, sum leh pai pawh ngah tura ngaih an ni - mahse an nun hi a nuam vek bik lo a, rilru lam harsatna neih phah hial pawh eng emaw zat an awm. A chhan leh vang chu 
eng pawh nise, engtin nge an paltlanga chu harsatna chu an hneh theih tih hi thil pawimawh tak chu a ni. 

Khawvel huap milar zingah - Adele, Ariana Grande, Bebe Rexha leh Becky G te chu rilru lam harsatna 
nei zingah an tel a, midang pawh sawi tur an thahnem hle. 

Adele
Rimawi huanga chawimawina ngaihhlut ber zinga mi, Grammy Award pawh vawi eng emaw zat lo 
dawng tawh Adele hian kum 2016 khan rilru lam harsatna a neih thu a lo sawi chhuak tawh. British singer hian postpartum depression a neih thu hi Vanity Fair ten an kawm tumin a sawi chhuak a, fa a neih hnu 
lawk a ni nghe nghe. Mahse huaisen takin a hmachhawn a, tunah chuan a hneh thei ta a ni. 

Ariana Grande
American singer Ariana Grande hian kum 2017 khan a rilru tibuai vek thei khawpa harsatna lian a 
hmachhawn a, a concert-ah mi 20 zet an thi. Manchester Arena, England-ah concert a nei a, a perform 
laiin mipui zingah bomb a puak a, mi 20 an thih bakah hliam tuar thahnem tak an awm. He thil thleng 
hian a rilru a tibuai nasa hle a, rilru lam natna chi khat Post-traumatic stress disorder (PTSD) a neih phah 
hial a ni. 

Bebe Rexha
A ni pawh hian bipolar disorder a nei a, a inhre chhuak lawk lo. Kum 2019 khan rilru lama harsatna a 
neih thu hi social media kaltlangin a tarlang a, harsatna paltlang turin a lo bei nasa hle a ni awm e.

Becky G

American singer leh actress ni bawk hi chuan tour a neihna atangin rilru lamah harsatna a neih phah hlauh mai. May 2019 khan hemi chungchang hi Instagram story-ah a sawi chhuak a, anxiety a nei nasa hle a ni awm e. 

Billie Eilish
Kum 21 mi lek Billie Eilish hi tunah chuan khawvelin tunge a nih a hre chiang tawh a, kum naupangte ni 
mahse rimawi hmangin khawvel a deng chhuak thei. Ani pawh hian larnate leh hmingthannate nei mah se rilru lam harsatna erawh a pumpelh phah bik chuang lo. Grammy Award 2020 sem dawn khan Gayle 
King hnenah a larna chuan depression a neih tir thu leh, mahni intihhlum mai duhna rilru hial a put tir thu a sawi chhuak. He tih hun lai hian kum 20 pawh a la tling lo nghe nghe a, a hlim leh theih pawh a inring lo hman hial a ni awm e! 

Camila Cabello
Obsessive-compulsive disorder (OCD) a nei thin a, mahse tunah chuan a hneh tawh. A hun lai chuan 
hmachhawn harsa a tive hle a, a inhriat chhuah atangin tal chhuah dan kawng a zawng nasa hle. Thil tha lo thleng dawna hriatna chuan a tibuai thin hle a, a rilru a thunun theih hnuah erawh harsa lutuk 
loin a paltlang thei ta a ni. 

Demi Lovato
Ruihhlo bawihah a tang a, thi lek lekin vawi eng emaw zat a awm. Demi Lovato hian kum 2011 daih 
tawh khan rilru lamah harsatna a tawh thu hi a lo sawi chhuak tawh a, hetih hun lai hina kum 18 mi chauh a ni. Bipolar disorder a nei tih hriat chhuah a ni a, treatment pawh a la rei viau. Kum 2021 khan 'Dancing With the Devil' music video a tichhuak a, a harsatna tawh chungchang pawh hi a tarlang tel a ni. Kum 30 mi American singer hian harsatna a paltlang hnuah pawh harsatna tawk ve midangte tan ke a pen zui a, platform a neih chu remchangah hmangin mental health awareness a kalpui nasa hle a ni. 

Ed Sheeran
British singer hian social anxiety a nei thung a, mipui tam tak pungkhawmte chu a tan chuan hmelma an ni ringawt! Mipui zinga awm hreawm a ti a, hei hi a eizawnna nen pawh a inmil lo lulai hle. Mipui tam tak 
hmaa zai thin a ni a, a hreawm ve thin khawp ang. Ed Sheeran hian tun hnai khan TV mini series 'Ed Sheeran : The Sum of It All' a tichhuak a, hetah pawh hian mental health leh depression lam a tarlang nasa hle.

Milar zingah - James Blake, Joe Jonas, Justin Bieber, Kanye West, Katy Perry, Kendrick Lamar, Lady 
Gaga, Mariah Carey, Megan Thee Stallion, Miley Cyrus, Nicki Minaj leh Selena Gomez bakah midang 
eng emaw zat pawh rilru lama harsatna tawk sawi tur an awm.

Khing a chunga kan sawite bakah khian, milar leh lar ve lem lo zingah pawh rilru lama harsatna tawk mi 
maktaduai tam tak an awm a, an la awm belh zel dawn ni pawhin a lang. Mi pawhin an paltlang thei 
chuan keipawhin ka hneh ve thei tur a ni tih rilru put a pawimawh hle.