Aizawl: Mizoram Merchant Association Gen. Hqrs. hruaitute chuan nimin khan Mizo hming hawha hnamdang dawrkai enfiah chhunzawmin hnam dang dawr atana luah tir mek te chu luahtir lo tura ngenna lehkha an pe bawk.

Mizo thenkhat, hnamdang (vai) hming hawhtirtu te hian pawisa tlem te hmu in Mizo hnam himna an hralh mekah MIMA chuan a ngai a ni. Chanmari kawn atanga tan in Bawngkawn an tuam zo deuh vek a. Vishal erawh an lo inhawng lova, a building neitu LRM te anmahni inah pek mai nise an ti.

MIMA Vice President Laldawngliana chuan, "MIMA hian kan sawm zau lem lova, a tul ang zela hmala turin kan insawm zau zel anga. Kan sawrkar kal tawhte leh tun sawrkar pawhin ILP chungchanga hma a lak dan hi a duhkhawp awm lo hle mai a, keini hian kan bei zel anga, sawrkar pawh a harh ve zel turah kan ngai a ni," a ti.

MIMA chuan AMC in permit a pek te an finfiah lo hle niin an hria a, permit an pekah Mizo hming ni si, vai lo thu an tam hle niin an sawi a. AMC chu an permit pek te hi enfiah a, a dik lo chu cancel ngam tura an duh thu an sawi bawk.