Aizawl: Nimin khan Media Department, Mizoram Pradesh Congress committe chuan press mite kawmin, April 22, 2019-a MNF sorkar Council of Ministers meeting-in Mizoramin Medical lam zirna In sang a neih chhun Mizoram Institute of Medical Education & Research (MIMER) hming ‘Zoram Medical College’ ti an thlak chu a hming ngai puttir leh turin an phut.
Medical lam zirna In sang Mizoramin kan neih chhun hma lam hun ngaihtuahna nei miah lo leh mipuite zahna nei miah lo a MNF sorkar hmalakna hi MPCC chuan a ngai thutak (serious) hle, tih chanchinbumite an hmachhawn naah an sawi.
“MIMER hming thlak hian nghawng tam tak a nei dawn a, MIMER hminga MCI-in phalna a pekna te, Mizoram Legislative Assembly-in ruang dah phalna dan a siam te, file leh document pawimawh zawng zawngte a nghawng vek dawn tiin, hun lo la kal zel tura kan thalaiten hriselna lama hmasawnna tur a zira zir mai bakah Research te an la neih theih nan leh, chutiang atana fund haichhuah leh zawn te pawh a rem zawk nana hmangchang hre taka Research tih tel te nuaibo a ni mai tur hi a hmathlir neih thui loh thlak hle a ni,” tiin an sawi.
Media chairman Lallianchhunga chuan ZALEN zawhna chhangin, “A hming ngai hi puttir leh ngei turin kan phut tlat a ni. A hming an thlak avang hian official file zawng zawng a buai vek thei dawn a, MIMER hian a nih tur ang a la nih loh avangin a nih tur ang a nih phak loh hi a hlauhawm a ni,” a ti.
Congress media department chuan, MNF sorkar hmasa khan Kohhran pakhat hnenah he damdawiin hi a zuar hial niin an sawi a. Congress-in sorkarna a siam leh khan tuaihnum lehin 2012 December ni 10 khan khum 150 awm theihna tura hlankai niin, MNF sorkarin Referral Hospital project a tihchhiat tak vek avangin Medical Hospital din tumna a lo awm chho ta, niin an sawi bawk.
February 19, 2014 khan Ministry of Health & Family Welfare atangin college din phalna hmuh a ni a, June 9, 2014 khan Medical College chungchang ngaihtuahtu Committee hmasa ber chuan medical college mai ni lo, research institute thlenga tihlen leh tihchangtlun theih tura ngaihtuahna thui tak sengin a hming atan ‘Mizoram Institute of Medical Education & Research (MIMER)’ tih chu a pawm fel ta a ni.
MIMER hian January 7, 2015 khan Mizoram University atangin Provisional Consent of Affiliation a hmu a, building sak chhunzawm niin, khum 150 awm theihna ni thin kha February 12, 2016 khan khum 250 awm theihna tura tihlen a ni zui a, tunah hian khum 500 awm theihna tura buatsaih mek a ni bawk. May 15, 2018 khan MIMER hi Ministry of Health & Family Welfare chuan MBBS seat 100 awmna tur Medical lam zirna in sang (Medical Institute) hawn phalna, ‘Letter of Permission (LoP)’ a pe a, September 13, 2018 khan Mizorama Medical Institute hmasa ber Mizoram Institute of Medical Education & Research (MIMER) hi hawn a ni a, MBBS seat 100 pawh hi hnawh khah nghal vek a ni bawk.
Congress media department te chuan, “MNF sorkar Council of Ministers Meeting-in MIMER hming thlak a rel hian Mizoram Medical College tih nise tiin rawtna a awm a. Amaherawhchu, ruahman lawkna leh ngaihtuah lawkna pawh awm lovin, Minister pakhatin a rilrua an party President Pu Zoramthanga hming lo lang zulzuiin ‘Zoram Medical College’ tih a rawt a, chu chu pawm a ni ta zawk a nih hmel,” tiin an thuchhuah-ah hian an tarlang a, an thlak chhan hi TV leh chanchinbu lam chuan, ‘a hming lam a nawm zawk nan’ tiin an sawi bawk.
&&&&&&&&