ZALEN June 8, 2026: Sawrkar hnathawk New Pension Scheme hmangtute chuan vawiin khan Old Pension Scheme a let leh phutin sawrkar kar nan a huhoin chawlh an la a, hei vang hian department thenkhatah hnathawh a kaihlak phah a, sawrkar damdawiin thenkhat OPD te pawh khar a ni.

Mizoram Movement for Old Pension Scheme (MIMOPS)-in ngenna an siam angin New Pension Scheme hmangtu mi thahnem tak chuan NPS subscriber mi 12,000 vel te tana Old Pension Scheme (OPS) a let lehna turin sawrkar kar nan vawiin khan Mass Casual Leave an la a. MIMOPS hruaitute chuan an beisei aia tamin Leave hi an la tih an sawi a, Association an nih loh avangin pawl member inkar chi a ni lo a, ngenna an siam chu zawmtu an tam an ti.

Thudawn danin, NPS hmangtu mi thahnem tak in chawlh an lak avang hian department thenkhatah chuan hnathawk tur an awm mang lo a, sawrkar hna kal lai te pawh a khaihlak phah a, sawrkar damdawiina thawktu, Doctor leh Nurse te pawhin chawlh an lak avang hian damdawia inenkawlna pawhin a tuar a, sawrkar damdawiin thenkhata OPD te pawh hawn lohin a awm phah a ni.

MIMOPS hruaitute chuan sawrkar nawr nan mass casual leave an la tawh a, sawrkar an karna hian awmzia a nei lo chuan OPS-a an let lehna tur hian theih tawp an chhuah zel dawn tih an sawi a, an hmalaknate thlirletna an neih tur thu leh kal zel dan tur chu an la rel leh dawn a ni.

MIMOPS chuan, Sawrkar laipuiin kum 2004-a New Pension System (NPS) a hman hnuah Mizoram Sawrkar pawhin kum 2010-ah a hmang tan tih sawiin, Sawrkar laipui chuan NPS chu tum eng emaw zat ennawn tawhin, tunah hian NPS aiah Unified Pension System (UPS) a hmang leh tawh a. Mizoram- ah erawh chuan kum 2010 atangin NPS thlakna emaw, ennawnna emaw pakhatmah a la awm lo tih sawiin Sawrkar laipui hnuaia thawk leh Mizoram Sawrkar hnuaia thawkte chu an dinhmun a inthlau tawh hle an ti. 

Old Pension Scheme hman an phut chungchangah hian Sawrkar-in October ni 27, 2023-a NPS Study Committee a dinin an zirchianna atanga rawtna an theh luh chu kum 1 liam hnuah pawh thutlukna mumal tak emaw, kal zel dan tur emaw siam a la ni lo chu pawi an tih thu an sawi a ni.

Picture : Geminigoogle AI