Aizawl August 14, 2023 : Mizo Hnamrun chhung inkhawm leh mithar lawmluhnaa  hnihnaa thusawitu C. Lalrosanga, MP(LS) MNF Adviser ni bawk chuan, "Pathian leh kan ram tan titute kan ni a, Pathian kan lama a tan tlat avangin, min beitute hriamhrei chher hi a sawt dawnlo. Pathian zarah hnehna kan chang zel ang. Thil tha tia theihtawp kan chhuah ve laiin beih kan tawk fo a. Rilru nat chang pawh a awm ve thin. Mahse, diriam taka min beitute tawpna hi a ropui vak ngailo," a ti. 

Delhi tlang boruak sawiin Lok Sabha MP chuan, "Thu in nasa takin kan inkap reng mai a. Central leh Manipur sorkar in an tihtur an tih a ngai tiin na takin all party meeting ah kan sawi tawh a. MNF President Zoramthanga'n huai tur leh Zofate tana ding nghet tlat tura min tih angin, theihtawp kan chhuah a ni," a ti.

NDA chhungah pawh harsatna a awm thu sawiin, "NDA meeting ah, Manipur chungchang leh UCC chungchang sawilan an phalloh avangin thu ka sawi duhloh phah a. A hnu lama MP inkoh khawmah pawh Manipur leh UCC chungchang sawi an phalloh avangin kan haw phah a. A hnulam meeting-ah pawh kan tel duhloh phah zel a ni. Session ah Manipur chungchang sawi ka tum reng a. Thusawi ka dilna chu a pilbo zel a, adjournment motion ka thehluh pawh hnawl a ni. Ka nu ICU a awm pawh ngaihsak thei loin, House-ah No Confidence motion thlawp turin ka thu tluan parh a ni," MP chuan a ti.

MNF Adviser chuan, "House ah hmui phuarsak nimah ila, National media lamin Manipur buaina chungchanga kan dinna an hriat avangin, min bawr nasa a. Na tak leh huai takin kan dinna ka sawi theih phah a. NDA lama kan thiante pawhin min be tha duhloin, chibai pawh ka dawng thei ta manglo hial a ni. Chutihrualin, kan unaute an lawm em em a, lawmthu ka dawng nasa a, inpumkhatna pawh a ngheh zel phah niin ka hria," a ti bawk.