Aizawl: Aizawl Dawrpui Venga Mosolman Biak In Committee ten Mosolman Biak In hrula mipui tana an siam tui thianghlim inna hmun ‘Water Point’ chu nimin zing khan bialtu MLA leh Sports Minister ni bawk Robert Romawia Royte chuan a hawng.

Hawnna inkhawm tawiah Minister chuan Mosolman Mosque Committee-in mipuiin a thlawna in tur tui vawt thianghlim Bazar lun laia an chhawp chhuak chu an fakawm a tih thu a sawi a, Mizorama Mosolman hnathawkte chu hmasawnna thlentu te zinga mi an ni a ti. Minister chuan, “Sawrkar dan dinglai anga ILP neih ngei ngei erawh sawrkar leh NGO te bakah mipui pawhin kan phut a ni,” a ti a, Mosolman Mizorama hnathawk turte pawh inhrilh thar zel turin Mosolman Mosque Committee te chu a chah a ni. Mizo society-ah veng leh khua hmasawn nan hnatlang neih fo a ni a, Mizo mipuiin phut lo mah se Mosolman hnathawka awmte hian an veng awmna hnatlangah te tha emaw sum emaw thawh ve thin chu an tihawm tak a nih thu a sawi bawk.

Tui in tur thiang-hlim hawnna puala function tawi hi Mammon Majumdara, Aizawl Mosque Committee Secretary-in a kaihhruai a, Central YMA Treasurer Lalrochuanga pawhin ILP ngaipawimawh turin Zorama lo chhuak Muslim te chu a chah a, Central YMA chuan a check fo dawn thu a sawi bawk. Dawrpui Local Council Chairman Baby Zosangzuali leh Dawrpui Br. YMA President Lalrammuana te pawhin thu an sawi bawk.