Aizawl : June 1, Inrinni khan Republic Veng Branch YMA chuan an veng Community Hall-ah Faina Ni an hmang a, khuallian School Education Minister Lalchhandama Ralte-in a hawng.

Minister hian Faina ni hawng nghalin faina chu zahawmna kengtu a ni a, pawn lam faina mai piah lamah chhungril faina a pawimawh thu a sawi a, chhungkaw tinte pawh mahni in leh a vel vawng faia tan la leh lehzual turin kalkhawmte a chah. Mizote hi zuk leh hmuamah kan fihlim lo a, kan sulhnu hi fai taka kalsan thin a pawimawh thu a sawi.

Republic Veng hian kum 2019 hi fai kum atan an puang a, kumtir atangin faina hnatlang hun remchang apiangin an nei thin. June thla atang hian faina kawnga section inelna neih tur a ni a, kum tawpah section fai ber hnenah lawmman an pe dawn a ni.

Lalchhandama Ralte hian Community Hall bula Primary School chu Republic Veng Co-Ordination Committee kaih-hruainain a en nghal a. Model School baka auditourium leh parking awm theihna tur Community Centre din tura khaw-tlangin a hnena an thlen chu School Education Minister hian tha a ti hle.

Khawtlang tana tangkai tur bawk sia ruahmanna an siam chu lawm-awm a tih rualin an ngenna chu department mi thiamte tira enfiah a nih tur thu leh Education Department chu nodal department-a an tan tur a sawi bawk a ni.