Aizawl June 21, 2024 : AMC Ward XIX By-Election atan ZPM chuan vawiin khan Kulikawn, Tlangnuam Mualveng, Tlangnuam W (Hridaikawn) leh Saikhamakawn ah te Street Campaign an nei a, he hunah hian Minister pathum leh Coroprator pahnih ten thu an sawi bakah Party Official Candidate Dr. C Malsawmtluangi pawhin thu a sawi.

He huna thusawitu Minister Prof. Lalnilawma chuan, AMC Ward No. XIX By-Election lo awm turah Ward chhung mipuite chu ZPM Candidate vote tura sawmin, ZPM chu MNF leh Congress aia policy nei tha, mipui huapzo policy neitu an ni a ti.

Supply Minister Lalchhanzova pawhin thu sawiin, "Kan ramah rorelna tha kan thlentir mek a. Tun zirtirtu lakah pawh Zoram mipui leh party hrang hrangte kan lungawi tlang a. Party mipuite pawh dik tak leh fel taka hna kan thawh theih nan min tawiawm zel turin ka sawm bawk che u a ni," a ti.

Lalnghingloa Hmar, MOS pawn thu sawiin, "ZPM Sawrkarna kan chan hma pawh khan AMC Ward no - XIX mipuiten duhsakna min hlan a Corporator min pe tawh a nih kha, tun By- Election lo awm tur ah pawh hian ZPM Candidate Dr C. Malsawmtluangi hi in khawngaih vote ka rawn dil che u a ni. He bial ah hian hmasawnna hna thawk thei tur leh MLA thurualpui theihtur hi, Ward chhung bial mipuite inkhawngaihna kan rawn dilpui a ni," a ti.

MYC Chairman Malsawmzuala, AMC Corporator pawhin, thu sawiin AMC Budget hi' Cheng Vaibelchhe 115, Nuai 18 leh Sing 4 a ni a. Chuta tang chuan Ward tin Corporator te ward fund tur atan Nuai 35 theuh dah a ni a. Ward development fund hi a inzat theuh kan nei thin. Nuai 35-ah hian mipuite thawhkhawm property tax atanga lo let leh a tel bawk .Ward fund budget-a kan pass thlap tawh atangin AMC MNF Sawrkar hian Kum 2 chhung nuai 10-in min pe kim thei lo thung , Corporator te nuai 20 theuh an ba a ni," a ti.

Corporator Lalawmpuii pawhin thu sawiin, "Lui pawh a fim chuan a hnar pawh a fim thin ang hian, ZPM hnar hi a fim a, chuvang chuan Ward mipuite tan chuan By Election-a ZPM Ward no -XIX Corporator atan Dr C. Malsawmtluangi hi thlang turin in khawngaih vote ka rawn dilpui a ni," tiin mipuite chu ZPM candidate vote turin a sawm bawk.

He hunah hian Dr C.Malsawmtluangi AMC Ward- XIV Candidate chuan, "He bial ah hian hnathawhkawr ha tur in ka rawn ding a, bial mipuite tan hnathawk thei a min siam tur in in khawngaih vote ka rawn dil tak meuh meuh a ni,'' a ti bawk.