Aizawl: Home Minister Lalchamliana chuan nimin khan a bial chhung, Keitum khua a Community Covid Care Centre mamawh tanpuina chi hrang hrang a pe a, tanpuina thilpek te hi Home Minister aiawhin H. Rochhuma, Hrangturzo West Block President chuan VLTF President J. Lalchharliana hnenah a hlan a ni. Home Minister hian buhfai bag 4, dal bag 1, hand sanitizer 132, face mask 10 pocket, gloves 3 boxes leh vitamin 'C' box 1 a pe a, duty-te thingpui inna tur a pe bawk.

Home Minister Chama chuan a bial chhunga COVID kai damlo an awm chu pawi a tih thu sawiin enkawl mekte pawh an dam leh thuai theih nan duhsakna a hlan a. Tlawmngaih chhuaha khawtlang tana duty VLTF te chungah leh, damlo enkawl ngaite enkawlna kawnga thawktu zawng zawngte chungah lawmthu a sawi bawk. Keitumah hian Community Covid Care Centre (4C) pakhat awmin mi 16 enkawl mek an ni a. Keitum CCCC-a lenglo mi 12 te chu Serchhipah enkawl mek niin, mi 3 chhuahtir an lo ni tawh bawk.

Social Welfare Minister Dr.K.Beichhua pawhin nimin khan Siaha Town chhung veng hrang hranga VLTF duty te tlawh kualin, an area huamchhung theuhva Covid-19 inkharkhipna avanga harsatna tawk  chhungkua te  chhawmdawlna tur Rs.10,000/- theuh a MLA Fund atangin VLTF 22 te hnenah a hlan a, MTP(Gen.Hqrs) Office pawh tlawhin, Covid-19 do nan Rs.10,000/- a hlan bawk.

MoS Dr.K.Beichhua chuan Covid-19 hrileng laka mipui kan him  theih nana ral hmatawnga a ding VLTF duty te inpekna leh thawhrimna chu ropui a ti thu sawiin, Siaha district   covid-19 laka a him theih nan tha thlah lova Covid-19 hri dona beihpui thlak chhunzawm zel turin VLTF te chu a  ngen hlawm a ni. Minister Dr.K.Beichhua hian a bial chhung Thingtlang khaw lama VLTF te pawh, kan hma kar khian tlawh chhuah vek a tum.

Law & Judicial Minister T.J. Lalnuntluanga, Champhai South bialtu MLA ni bawk pawhin nimin khan a bial chhung Zokhawthar khua, Covid-19 hrileng vanga Containment Area a awm mek chu chhawmdawlna thilpek a pe. Zokhawthar khuaa harsatna tawkte chhawmdawlna turin Minister hian ei leh in mamawh Tel, Dal leh Neutrela engemawzat a pek bakah tul leh mamawha hman turin  pawisafai Rs 10,000/- VLTF hnenah a pe a. Heng tanpuina ei leh in leh sumfaite hi Minister aiawhten Zokhawthar VLTF  kutah an hlan a ni.