Aizawl December 24, 2022: National Student Union of India (NSUI) Lawngtlai te chuan vawiin khan thuchhuah an siam a, Vathuampui Supply Godown a buhfai dahkhawlsa chu a hlui tawh em avangin mihringte ei tlak loh khawpa chhia niin an tarlang a, buhfai hlui te hi minister pawn thlamuang taka a ei ngam tur Buhfai thara thlak turin an ngen.

Congress zirlai pawl chuan Buhfai te hi a chhiat piah lamah bag thenkhat chu a hmuar in, kuttum leng deuh thaw in a pawp fur mai bawk niin an sawi a. Buhfai hi hlui tawh em avang leh a hmuar nasat avangin chhuat-ah thahnem tak chu bag tel lovin dah khawm a ni, an ti. 

Food, Civil Supplies & Consumers Affairs Minister K. Lalrinliana chu a rang thei ang ber a hemi chungchang chhui chiang a, hma la nghal turin an duh tih an sawi. "Tun a buhfai hlui awmsa hi la let a, a thar hlak kan minister te pawn a thlamuang taka an ei ngam tur rawn dah turin kan phut in kan ngen nghal bawk a ni," NSUI chuan an ti. 

Vathuampui Supply Godown chu a chhehvel mi te ration lak na ber a ni tih an sawi a, a tam ber chu kuthnathawka ei zawng an nih thu an sawi a, buhfai a an inngahna ber ration buhfai, stock hlui leh hmuar an pe duh chu Lawngtlai West mipui thamlohna leh hmusit naah an ngaih thu leh rilru nat thlak an tih thu an tarlang bawk.