Zawhna: Ka pu, mipa kum 66 ka ni tawh a, zunthlum hi kum 10 chuang ka vei tawh a. Thla 6 vel kalta atang khan sex lamah ka chak lo ta riau mai a, a damdawi emaw a enkawl dan emaw a awm thei ang em? Khawngaih takin min puih theih chuan ka lawm khawp ang.

Chhanna: Issue hmasa lamah te hetiang lam zawhna hi kan chhang fo tawh a. Sex chungchang hi mihring ah a in ang lo thei hle ani tih hre hmasa ta ila. Mipa hi engtia rei nge sex drive an neih tih chungchang te pawh hi a in ang lo viau awm e. Mithiamte chhut danah chuan kum 60-70 chho ah hian mipa tisa chakna (sex drive) hi a tla hniam chho viau niin an sawi a, mahse eng level emaw tal chuan sex hman kawngah an la active thei niin an sawi a. Kum 70 pelh tawh lamah erawh chuan a tam zawk chuan sex drive hi an nei chau chho niin an sawi (average angah ngaih tur).

Chutiang anih lai chuan kum 80 kai tawh hnua nupui nau la pai thei nei leh a, fate pawh nei leh hi sawi tur an awm leh zauh thin thung. Tisa chakna hi rilru ah a innghat lian hle mai. Zirchianna thenkhat ah chuan kum 50 an kai hian sex lamah an san hun lai an thleng thei tih te pawh an sawi a, mahse kum a lo tam na na na chuan taksa khawl a lo chaurau tan a, rilru lamin peih mahse taksa lamin a tlin lo fo thin. Natna benvawn, a bik takin zunthlum leh thisen sang nei te ah hian sex drive hi a tlahniam duh zual bawk. Chuti chung chuan taksa in la fit tha leh in enkawl tha te ah chuan kum 50-60 chho ah pawha sex lama in fit tak hi a awm theih.

Zunthlum bikah hian control that leh that loh kar a inthlau thei hle. Kum a lo tam deuh phei chuan control tha lo te ah hian han insawiselna em em nei chuang lo hian nerve lamah harsatna a thlen duh phian a, a lang chhuak mai lova, a lan chhuah dan common tak chu sazu fuk tha thei lo (erectile dysfunction) te hi a ni fo. Zunthlum hian kan sawi tak angin nerve hnathawh a ti buai duh viau mai a, sazu chawmtu nerve te a khawih tel phei chuan a fuk nana pawimawh sensation te a ti buai a, chu chuan sex lam chak lohna a thlen fo thei a ni.

Sex drive lama tlahniam te tana damdawi an hman lar tak mai chu Sildenafil hi a ni a, Viagra tiin a rawn lar a, tunah chuan India ramah pawh an chawh common tak zinga mi a ni chho a. He damdawi hi a hman dan tur dik taka hman chuan a tangkai thei phian a, mahse natna benvawn, a bikin lung leh thisen zam lam fel lo engemaw ah te erawh hman fimkhur a ngai thung. Tin, zunthlum vanga nerve lam chak lo ah phei chuan a thawk mawh fo bawk. Engpawh nise, medicine specialist te lo inentir leh thei la, I zunthlum control dan te pawh ennawn leh se, I harsatna hi chu an puih theih che ka ring.