Aizawl August 22, 2024 : Bilkhawthlir Police te chuan POCSO case kaihhnawihah school naupang pakhat lakah complaint an dawng a, hemi bawhzui hian dan kalha che nia sawi mipa naupang hi Juvenile Justice Board, Kolasib-ah thawn nghal a ni.

Thudawn danin school naupang pakhat chuan hostel-a awm ve a mipa naupang pui dangte lakah mipat hmeichhiat lam hawiin a khawsa thin a, mawilo taka a chet dan hi sawi chhuak lo turin a vau bet thin a ni.

Hemi kal zelah hian nizan hmasa (Thawhlehni zan) khan a tuartu naupang 7 te chu ngawi thei tawh lovin an tlan chhuak a, an nu leh pate chuan an chunga thil thleng hi hre chhuakin, Bilkhawthlir Police ah FIR an thehlut a ni.

Hemi hma hian naupang thenkhat pawh school hostel atang hian an lo tlanchhuak tawh a, an chhungte hnenah engmah an sawi ngam loh avangin hriat chhuah a ni lawk lo. Tun tumah hian an hre chhhuak ta chauh a ni.