Mizoramah kum tin naupiang hmeichhia aiin mipa an tam deuh zel a, mahse puitlingah erawh hmei chhia an tam zawk thung. Mizorama puitling hmeichhia an tam zawk chhan hi mipa thi an tam vang a ni a, mipa thih chhan ber hi ruihhlo kaihhnawih nia hriat a ni.
Aizawl veng pakhata YMA hruaitu chuan nikum lama mitthi an neih zingah mipa an tam zawk tih sawiin heng zingah hian thalai han tih theih mai, kum 50 hnuai lam an tam hle tih a sawi a. Heng mipa thi ho hi a tlangpuiin ruih hlo zu leh damdawi ti an thahnem hle niin a sawi. Sawrkar hnathawk sang tak pakhat chuan an vengah hmeithai an tam hle tih Zalen a hrilh a, hei mai bakah sawrkar office leh bazar ah pawh hnathawk tam ber chu hmeichhia an ni tiin mipa an tlem ta lutuk chu veiawm a tih thu a sawi a. Mizoram sawrkar hnuaia department hrang hrang zingah Police (Home Department) tih lohah chuan department hrang hrang zingah mipa aiin hmeichhia an tam zawk vek a rin thu a sawi bawk.
Mizoram damdawi in zinga mipuiin an pan tam ber Aizawl Civil Hospital report atanga a lan danin kum kum 5 kalta chhung (2014-2018) khan an damdawi inah naupiang 21,789 an awm tih Zalen hrilhin heng zinga a tam zawk 11,213 chu mipa niin hmeichhia 10,576 an awm a, hmeichhia aia mipa an tam zawkna hi 637 a ni. Kum 5 kalta chhung vek hian Aizawl Civil Hospital-ah hian thi 3,790 an awm a, thi tam zawk hi mipa an ni tih an sawi.
Mizoram electoral roll chhuak thar berah chuan Mizoram pumah voters (kum 18 tling chin) 784405 an awm a, an zinga a tam zawk 402,408 chu hmeichhia an ni a, mipa 381,991 an awm bawk. India state dangah chuan chuan hmeichhia aiin mipa voters an tam zawk deuh vek a, hetih laia Mizoramah hmeichhe voters an tam zawk chhan hi central lam pawhin mak an ti a, zawhna an dawng fo thin niin Election department-a thawk pakhat chuan Zalen a hrilh.
Aizawl Civil Hospital a senior Doctor pakhat chuan mipa thi an tam chhan chu zu kaihhnawih a ni ber niin Zalen a hrilh a. "Zu kaihhnawih vanga thi leh damlo hi an tam em em mai a. Mi tam tak thihpui thin thalo, pumpui thalo, thisen put leh thildang te hi zu vanga awm a ni a, hei mai bakah kaihhnawih chi hrang hrang a nei bawk a. Tam tak hi a nihna ang rawt rawta kan ziah loh avangin thildang an puh mai thin a, mahse a nihna takah chuan ruihhlo kaihhnawiha thi mipa hi an tam hle a ni," a ti.
College a thawk Asso. Prof. pakhat chuan tun ang zela kan kal chuan Mizoram hmalam hun chu a thim hle dawn nia a hriat thu a sawi a. "Mizo mipa ten heti tak maia zu kan hmang thiam lo hi a vanduaithlak hle mai a, tun ang zel kan nih chuan nakin lawkah hmeichhia ten Mizo pasal tur an hmu lo ang a, hnamdang pasal ah an nei lo thei lo dawn a. Mizo hnam hi a la boral mai ang tih a hlauhawm hle a ni," tiin Zalen palai a hrilh bawk.