Aizawl June 3, 2024 : Vawiin khan Mizoram Sawrkarin Mipui huapzo damlo enkawlna - Universal Health care kalpui a tum chungchangah Health Minister Lalrinpuii ho in Sawrkar lam thuneitute leh Non-Government Hospital Association, Mizoram (NGHAM) hruaitute chuan inkawmhona an nei.

He hunah hian Dr Biakthansangi, CEO, Mizoram Health Care Society in Mipui Huapzo Health Care duan dan chungchang tlangpui a sawifiah a. Mipuite tana man chawi lova damdawiin awm - Cashless a kalpui a nih theihna tur atana Sawrkar inbuatsaih dan thlengin a sawifiah bawk.

He hunah hian Lalrintluanga Jahau, President, NGHAM chuan health care kalpui dan tur leh Sawrkar in a sustain theih dan tur ruahmanna tha awm se a duh thu a sawi a, tunhma lama health care lo hlawhchham tawhna chungchangah Mizorama Private Hospitals te chuan sum tam tak an lo hloh tawh avangin hetiang a thlen nawn loh na tura ruahmanna tha awm thei se a duhthu a sawi a ni.

Inrawnkhawm hian TBC Lalvenchhunga, Adviser to CM (Finance) leh KC Lalmalsawmzauva, Adviser to CM(Handholding) te chuan Health Minister hi an tawiawm a, Adviser to CM (Finance) chuan package system kalpui dan turte, premium hrang hrang Siam tum anih thu te, payment mode leh fund flow chungchanga Sawrkar inbuatsaih dan te a sawifiah bakah Sawrkar ah rinna nghat ngam turin NGHAM hruaitute chu a ngen nghal bawk.

Lalrinpuii, Health Minister chuan lawmthu sawiin, Mipui Huapzo Health Care hi a hlawhtlin ngei theihnan tanrual puiah NGHAM hruaitute a sawm a ni.