Aizawl: ZPM Southern headquarters chuan Health Minister Dr.R Lalthangliana leh Zodintluanga Congress MLA te chu Lunglei mipuite hriselna Politics Ball-a hmang tawh lo turin an ngen tih an sawi.

Nimina thuchhuah an siamah ZPM Southern Headquarters chuan Health Department in Lunglei a RT-PCR khawl install tur in May 7, 2021 khan order a lo chhuah tawh a, nimahsela vawiin thlengin hmalakna mumal ala awm lo a. RT-PCR khawl hi a awm lohna party leh Opposition lam pek a nih avanga ngaihsak lo leh hman theih tur a buatsaih chak tha duh lo ah Health Minister kan ngai a, pawi kan ti hle a ni, an ti a. 

Congress MLA Zodintluanga pawh hian MLA Fund a?anga a lei khawl hi hman a nih thuai theih nan a In (room) sak na tur leh a senso zawng zawng tum a in huam thu a lo sawi tawh hi a tihhlawhtlin vat kan beisei a ni, an ti a. Hripui len vanga mipui kan mangan lai a hmanraw pawimawh tak mai Politics Ball atana hmang duh ram hruaitu leh Party pahnih, MNF leh Congress te kan nei hi ZPM Southern Headquarters, Lunglei chuan vanduaithlak a ti hle a. An ni pahnih Politics game inthial tuar tua mipui kan tang hi pawi kan ti tak zet a ni, an ti bawk.