Tunhnai khan Mizorama bank hnathawh dan viltu State Level Bankers Committee (SLBC) chu thukhawmin Chief Secretary leh an chairman ni bawk Renu Sharma chuan bank te’n an sum dawn atanga loan anga pukchhuah tir thin credit-deposit ratio (CD Ratio) chu a hniam hle tih a sawichhuak a. Loan pek chhuah lamah tan la turin Mizorama bank awm te a fuih bawk a, bank 4 tichhe zual sawichhuah a ni bawk. Mizorama bank awm te sum dawn atanga loan an pek chhuah CD ratio chawhrual chu zaa 49.30 chauh a tling phaa, tunah hian bank 24 awmin branch 227 an nei mek a ni.

    Bank te hian dinchhan an nei a, an pawisa dawn atanga sumdawng an nih rualin an awmna hmuna mipuite pui tur an nih avangin pawisa puk tir hi a theih chinah an tih makmawh a ni a. Bank rawn in bun hi kan ram tan a that rualin mipui chanvo tur pawisa an puk chhuah tir leh bawk si loh chuan an din chhan pakhat an thelh tihna a ni a. A bikin mi hnuai hnung zawk te dinchhuahna tur emaw, bul tan tur hmathlir nei tha te emaw sumdawng lian midang hna siamsak thei te emaw an ngaih pawimawh a tul khawp ang. Tuna kan dinhmunah hi chuan hna nghet nei lo tan chuan pawisa puk hi a har hle niin a lang tlat a ni.

    Bank te hi mipui leh sawrkar sum dahluh vawngtu an ni satliah loa a, suma sumdawng an nih avangin an sum dawn atanga 60% tal chu mipui an pukchhuah tir tur niin CD Ratio 60-70 nei thei bank hi hnathawk tha nia ngaih thin an ni tlangpui a,  hei hi Mizorama bank te’n an pha lo fo a ni.  CD Ratio hniam hian bank hrisel leh hrisel loh a lantir rual-in bank sum lut zat atanga mipuia pawisa vir leh tur pawisa puk tir lama an hniam zia a lan tir a tih theih bawk ang.                Tuna CD Ratio 49.30 hi Mizoram pum bank chawlhruala lak a nih hmel a, bank ti tha an awm thei a, a ti tha loin an pawt hniam a ni thei bawk a, bank mal te te dinhmun hi enchian a ngai a, a ti tha lo te chu enzui an ngai dawn a ni.

    Lehlam zawnga thlir chuan bank te hian loan pe chhuak turin a puk tum te lam atangin rawtna/dilna tha leh him zawk an dawng tam lo a ni ve thei bawk a, bank kalphung (financial literacy) lamah mipui kan la sang lo hle a tan lak a ngai a ni thei bawk. A chhan chu eng pawh nise loan tam zawk pukchhuah tir tura kan mutan lai hi zirchiana bawhzui a ngai tih a lang a ni. 

    Sum dah luh ring ringawta sumdawng tum bank an awm a nih chuan a pawi hle thei a, Bank kawm deuh te hi kan ram hian an mamawh takzet em? tihte pawh rilrua dah a ngai hial tawh awm e.