Aizawl : Nimin khan Mizoram Pradesh Youth Congress Committee chuan, MNF Sawrkar kal mekah hmun hrang hrangah electric eng a mumal lo hle an ti a, Aizawl veng tamtak leh khaw tam takah electric eng hmanga eizawngtute an buai hle laia el;ctric eng chhit man tih pum tum chu thulh turin, an phut tih an thuchhuahah hian an tarlang.

"Mipui hnena hriattirna pe hmasa lova eng tihthim tam lutuk hi Congress thalai chuan hriatthiam har kan a ti a, sawrkar siamtu mipui thamlohnaah kan ngai. Heti khawpa electric eng tha lo leh electric hman man sang tak mipui tan phurrit anih mek lai a, electric hman man uchuak taka sawrkarin tihpun tumin, 2020-2021 atang hman atan rate thar a ruahman a, sawrkar sum indaihlohna phuhrukna turin mipui tawrhna a thleng leh dawn. MNF sawrkarin a sum neih loh hliahkhuh nana power tariff uchuak taka tihsan a tum hi sut leh nghal turin Congress Thalai chuan kan phut a ni," an ti.

MNF Sawrkar chu erawh central lamah Modi-a thawhpuiah puhin thiam takin thil an sawi thin niin an tarlang a, A tak hmuh tur erawh hmuh tur a awm lo niin an tarlang. MNF sawrkarah mipui tan hman tangkai tur leh mipui thleng phak sum leng vel a vang hle a ni, tiin sawrkar zem zen pha ve lo, sumdawng te, kuthnathawka eizawng leh loneitute tan harsatna lian tak a thleng mek a ni, an ti a. Financial management thiam tak Finance Ministry enkawl tur an mamawh takzet, an ti a, thu chuaha development ni lo, a tak rama thil thleng ngei Zoram mipui chhawr theih tur hi Congress thalai chuan a duh thu tarlangin sawrkar chu hmala turin an phut.