ZALEN August 30, 2023  : Vawiin khan ZPM Leader Lalduhoma, MLA chuan Buarpuitlang dung (Lunglei West bial chhung) ah campaign neiin hun a hmang a. Mipui Sawrkar din tura thawkho turin kalkhawm te a sawm a, Corruption do turin a do dan tur duangin an hotuten hma an la a ti a, ZPM chu mipuite ta tura din a nih thu a sawi.

Serte Village Council Hall-a Vantlang inkhawm buatsaih ah ZPM Leader Lalduhoma chuan, "Mipuite beiseina thar pe turin ZPM hi a piang a, that zawk kan tum tur a ni a, mipuite min rinna hi kan tichhe tur a ni lo, Pathian hruaina kan chan laiin keini Party hi kan fimkhur tur a ni. Corruption do turin a do dan tur duangin kan hotuten hma an la a, corruption Measure tur pawh an duang fel tawh a, he ramah hian Sawrkar tha, mipui Sawrkar a lo din theih nan mipuiten min puih kan mamawh a, kan Candidate te min vote tlin sak theuh turin mipuite kan sawm a ni," a ti.

Lalduhoma chuan, "Kan ram Politics kan hretlang a, Opinion Poll te lak a ni a, ZPM in pahnihna te pathumna lakna kan nei a, mahse a pumpui ah pakhatna kan ni a, hei hian kan Politics dinhmun a tilang a, vawiinah hian MNF leh Congress te hun hi a liam mek a, chu chu mipuite hmuh dan a ni a ram kalphung a inher a, hemi ang hian kan inher rem a tul a ni a ti. Pathianin a hunlaia a ruat te hi rahbeh theih a ni lova, MNF leh Congress te hi Pathianin mal a lo sawm tawh a, vawiinah hian ZPM hun a lo inher chhuak ve mek niin a lang a ni," a ti.

ZPM Leader chuan, "Sawrkarna hi Pathian leh mipui zarah kan chang ve a nih chuan kan budget pharh turah leiba nasa takin min delh mah se, Delhi leh State dang te pawh hetiang hi an lo ni tawh a, mahse roreltute an inthlaka vawiinah chuan a hmasawn zawngin an kal tawh a, keini pawh kum hnih khat hnuah chuan insiam that theih tura hnathawkin hmalak kan tum a ni," a ti.

Party mi te fuihin Duhoma chuan, "Rorelna fel kan neih theihna turin Pathian thu hi a hmanrua tur a ni a, ringtu tha inti viau si a, eirute leh sualna zakzeh tel tea kan awm tlat thin hi kawng dik lo a ni a, kan nunkawng engkim hi rorelna a nih avangin Pathian tihna a tel a ngai a, he harhna hi mi tam takin an chang a, Sawrkar tha zawk din turin mipui an tui hal a, chuvangin keini ZPM Party te hi kan danglam tur a ni a, mipuiten min tawngtaipui a, kan kalsual hi an hlau em em a ni," a ti bawk.