Aizawl : Nimin khan Hachhek bialtu MLA Lalrindika Ralte chuan a bial chhung W. Bunghmun-ah MNF VC leh BJP VC member Congress Party-ah a lawmluh naah mitin mamawh chu sawrkar tha a nih thu a sawi a, miretheiin sawrkar tha kan mamawh zual hle a ni, a ti. 

Lawmluhna inkhawm hi W. Bungtlang Community Hall-ah neihah Lalrindika Ralte, MLA chuan, "Ram kaihhruainaah hian kan ram leh hnam tan kan theihna sang ber kan hlan tur a ni a. Kan ram kaihhruainaah hian dik leh rinawmna khawiah nge a awm? Thil dik lo titute hi an inthlahrung ta lo khawp mai. Sawrkarna siamtute hi mipui kan ni a, chuvangin, inthlanna hi kan ngaihpawimawh a ngai a, kan ti mai mai tur a ni lo. Mi tha ram hruaitu kan mamawh a ni. Sawrkar tha nei turin mipuite hian mawhphurhna kan nei a ni. Mahni chhia leh tha hriatna hmang thei lo nih hi i tum lovang u. Kohhran te, kuthnathawktute pawhina kan mamawh chu sawrkar tha a ni. Ram leh mipui hmasawnna chu mipuite kutah a awm a. Tin, mi retheite hian sorkar tha hi kan mamawh zual hle bawk a ni," a ti.

Rindika chuan, "Vawiina kan sawrkar hi mipuite siam a ni. Nakumah kan inthlang dawn. Eng ang sawrkar nge kan din leh dawn? Mahni hmasial, dik lo te hnawl ngam turin chakna kan nei a. Mi dik lo te kan hnawl ngam lo a nih chuan kan hma lam hun a thim khawp ang. Kan ram leh hnam dinhmun hi siamṭhat theih loh a ni lo va, beidawng mai tur kan ni lo, a thlak danglam tura kan thawh erawh a ngai a ni. Politics hi a dik chuan ram hian hma a sawn dawn. Thufing pakhat chuan sawrkar tha a retheih nih a zahthlak a, sawrkar tha lova hausa nih erawh a zahthlak. Kan ramah sawrkar sum harsat zia kan sawi nasa a, hetih laia lo hausa fal an awm a nih chuan kan ram leh hnam min phatsanna a ni a. Chutiang mi chuan ram hruai tum tawh lova lo inthiarfihlimna chang hria se an mahni tan leh mipuite tan a tha zawk a ni," a ti bawk.

Hachhek MLA chuan, "Khawvel ropuina leh hausakna an tih hi ka thlahlel ve lo, kan ramin hma a sawn a ngai. MLA kan ni a, thenkhatin 'Sir' te min ti a, Sir tia inkoh hi a tul lo, Sir tiin min ko ta ula, kan ramin hma a sawn si loh chuan eng tihna mah a ni lo, kan ramin hma a sawn a nih phawt chuan ka hming pawhin min ko ula, kei chu ka lawm em em ang," a ti bawk.