Sunsilk Mega Miss North East 2014 — 12th edition-ah Mizoram aiawha feh chhuak pahnihte — Leni Ralte leh Sawmi Chhakchhuak chuan Mizoram hming an ti tha hle. Kum 23 mi, tuna Khatlaa awm mek Leni Ralte chuan top 3 zingah a inhlangkai a, hetiang dinhmun hi Mizo model zinga thleng phak an la awm hauh lo. Sunsilk Mega Miss North East 2014 neih zawh takah, Mizoram aiawhtu zinga pakhat — Lallenpuii Ralte, Leni tia koh chuan bung thar min kai pui thei ta. Mizoram aiawha he Miss thlannaa neihah a sang pathum (Top 3) zinga inlan thei hmasa ber a ni ta. Mizoram aiawhtute hian a 'ber' nihna an hauh teuh tawh viau. Kum hmasa lamah te he Sunsilk Mega Miss North East intihsiaknaah te tel a lo ni tawh thin a; mahse, kumin ang em ema an thlen san hi la tawng lo mah se, a che chhe pawl an ni lem lo. Mizoram aiawhin Mamuani kha a lo tel tawh a, a ni pawh kha a sang berah inhlangkai lo mah se, Best Model atan an lo thlang tawh a. A kum lehah Nunui Sailo tirh chhuah leh niin, a ni pawh hian Top 5 dinhmun a luah phak a. Kuminah hmasawnna a zuanin a zuang a ni deuh ber. Leni Ralte chu a tawp thlenga beiseina nei phak zingah a rawn ding chhuak a; mahse, Meghalaya nula lakah a vanduai ta hlauh zawk a. Guwahati-a neih zawh takah Mizoram aiawhin mi pahnih an tel a. Tuna Gov't Aizawl College Miss ni mek C. Vanlalmalsawmi, Luangmual leh Lallenpuii Ralte, Khatla te chu telin, Hmarchhak State-a Miss thlanna ngaihhlut hlawh ber zing a mi Sunsilk Mega Miss North East 2014-ah hian a ti kimtu satliah mai an nih lohzia an zuk phawrh chhuak a. He intihsiaknaah hian hmarchhak state-a nula chhe lo tak tak mi 36 zingah Mizoram hming pawh an zuk ti tha viau e. Sunsilk Mega Miss North East-ah hian State pakhat aiawhin model duh zat zat a tirh theih a. Mizoram erawh chuan mi pahnih chauh hi kan tling tawk a la ni rih e tiin Sawmi Chhakchhuak leh Leni Ralte te chu tirh an ni a. State dang atangin pahnih aia tir pawh an awm a; pahnih aia tam an tir fur a ni zawk mah! He Miss thlannaah hian April ni 7 atangin Guwahati-ah intihsiakna tan tura an thlen khawm hnuah, April ni 12 leh 13, 2014 zanah final round neih niin, cheng nuai khat dawn bakah Mumbai khawpuia fashion show ngaihhlut hlawh tak — LAKME FASHION WEEK-a North east aiawh tu tur inchuhnaah hian Natasha Wahlang (Meghalaya) chu pakhatna atan thlan chhuah niin, Archana Barman (Assam) chu pahnihna a ni ve thung a. Lallenpuii Ralte (Leni) chuan pathumna ni turin thlan chhuah a ni ve bawk.