Aizawl: Baptist Church of Mizoram, Aizawl West Area Baptist Council Inkhawmpui leh Rorel neih mekah Mission rawngbawlna a Presbyterian Kohhran nena thawhho dan kawng zawn nise tih rel a ni.

BCM Biak in, Central Church, Aizawl a inkhawmpui neih mek hi Zirtawp zan dar 6:30 khan ṭan a ni a, Pathianni zanah a ṭiak ang.

November ni 26 Inrinni nileng a rorel inkhawm neihah Pastor bial 6-a kohhran 40 aṭangin palai an kal bakah BCM Hqtrs . atangin Rev. R. Lalbiakliana AGS i/c Service-in a hmanpui bawk.

Nimina rorel inkhawm hi Chairman Rev.H.Sangchema'n a kaihruai a, Agenda zinga mi Mission rawngbawlna a Presbyterian Kohhran nena thawhho dan kawng zawn nise tih chu pawm niin, hei hi rorelna sang zawk BCM Assembly a ngaihtuah that leh tur a ni dawn a ni. Hei bakah hian Missionary leh Pastor thi nupui leh pasal te eizawnna ngaihtuah sak rawtna pawh sawiho a ni a, missionary pensioner zinga chenna in nei lo tana Home siam chungchang leh Mizoram pum huap a Thlarau Thianghlim harhna dila ṭawngṭai neih rawtna pawh agenda lian zinga tel.

Rorelah hian Aizawl West ABC huam chhung bial 5 a Kohhran 15 atangin Kohhran upa 28 thlan dilna dawn chu pawm a ni.

Aizawl West Area Baptist Council Inkhawmpui vawi 27-na leh Rorel vawi 28-na neih mekah hian tun hnaia Kohhran hruaitu leh missionary thi mi 16-te sunna hun hman a ni a, Pathianni chawhma inkhawmah Upa thlan thar mi 5-te nemnghehna hun hman a ni anga, Pathianni chawhnuah Lalpa zanriah Sacrament inkhawm buatsaih niin, Pathianni zanah he inkhawmpui hi a ṭiak ang. Aizawl West ABC Inkhawmpui hi kum 2022-ah BCM Bethlehem Vengthlang leh Republic Vengthlang Pastor Bial ten an thleng dawn a, kum 2023-ah Lengpui Pastor Bial-in an thleng ang.