ZALEN July 29,2024; GBU Mission School, Tirbin, Arunachal Pradesh East Field-a BCM missionary-a zirtirtu hna thawk L Malsawmtluanga chu nimin tlai dar 4 khan tuiah a tlahlum a, naktuk (30.7.24) chhun dar 12 ah vui a ni ang.

Tarlan tawh angin, L Malsawmtluanga te hi nimin tlai khan an thawhna khaw bul luiah inchiah dai turin an kal a, a tlakna lai hi lui pahnih inzawmna a ni a. Luikama a chhuak tur chu a tlu palh a, tuiin a len ta nia hriat a ni, a tlakna atanga metre 500 velah a tlak atanga minute 20 velah a ruang hmuh a ni.

L Malsawmtluanga hi BCM Emanuel, Luangmual, Aizawl sponsor a kal niin, thla hlui June, 2024 khan missionary atan tirh chhuah a ni a, amah hi tlangval a la ni.

L Malsawmtluanga (Mampuia) kum 22 hi L. Johana fapa, BCM Emmanuel. Luangmual Vengthlang a lawi a ni. Amah hi tlangval nungchang tha tak leh mi inthlahrung mi tak a ni.

Pathianah hlimna leh lawmna nasa tak neiin Missionary a chhuah a duh thu hi Kohhran Committeeah a thlen a. Headquarter lamte dawr niin Galo Mission School, Tirbin Arunachal East Field a thawk turin June ni 2, 2024 Pathianni khan BCM Emmanuel Biak inah Rev Lalremsiama Ralte (Mission Director) in tirhchhuahna a nei a ni.

June ni 4, 2024 (Thawhlehni) khan a thawhna tur panin a kal a ni.

A ruang hi Tirbin atangin nizan dar 8 bawr velah an lo chhuah pui a, kawngte a that loh avangin an kal chak thei lo a, zanin zanrei lamah an rawn thlen beisei a ni a, naktuk chhun dar 12 ah BCM Biak In, Luangmual Aizawlah vui a ni ang.