ZALEN Aug 20, 2024; Misual mi 5 ten nizan hmasa khan Lunglei district, Mausen khaw bul, Tlawng lui kamah hnamdang vai motor lo ti dingin an suam a, Rs. 30,000 an chhuh sak.

Thu dawnna in a tarlan danin, heng misualte hi Chakma an nia, hnamdang vaite hi mi 3 niin Silchar lam mi vek niin hriat an ni. An zinga pakhat chu a ban dinglam ban rek ruh a tliaka, a keah chem a hliam a ni bawk. A banrek leh ke lama hliam nei hian a sawi danin, misual pakhatin Chemtea vih atum chu a kein a lo invenga, misual hian a keah a chem hriam ken chuan a hliam ta a, a tlukna lamah a banrek a ti na ta niin a sawi.

Hnamdang vai pakhat chuan hliam tenau a nei bawk. Heng mi- kut tuarte zinga pahnih hi nimin khan Lunglei police lamin statement lain thil an zawtfiah a. An thian pakhat, thil hrechiang thei ber tura ngaih rickshaw driver chu Silchar lam alo thlen thlak hman avangin police ten thu zawhfiah turin an ko let a, Silchar atangin Mizoram a rawn pan leh niin thu dawn a ni.

Pawi khawihtu mi 5 te hi vawiin khan Lunglei Police lam chuan an man kim vek a, thu zawhfiah turin Lunglei Thana ah an la kawl mek niin hriat a ni.

Hnamdang vai suamtu mi 5 zinga pathumte hi Lunglei thlang, Kau chhuaha awm an nia, pahnih dangte hi Tlabung khaw per, Chakma khuaa cheng niin hriat an ni.