ZALEN May 13, 2025; Aizawla kutdawh zingah khaw hmu lo, mitdel engemawzat an awm a, an dinhmun hriatthiam pui bik an duh hle a; kutdawh dang nen angkhata en loh an duh tih an sawi. Hetihlai hian, tunhnai deuh atangin hnamdang kutdawh Aizawl khawpuiah an pung nasa.

Aizawla kutdawhte awmna ber chu Dawrpui Veng huamchhung a ni a, tunhnaiah kutdawhte hi khawtlang hruaitu lamin an zirchiang. Rualbanloh avanga kut dawh lo thei lo an nihna nemnghet tura sawrkar hruaitpui document an neih dan leh an dinhmun, rual an ban loh dante an zawtchiang. Zirchiannaa a lan danin, mit del avanga kut dawh ta an awm laiin, rualban lohna dang avanga kut dawh an awm a; document nei mumal lo an awm bakah Zohnahthlak ni lo pawh an awm. Aizawla in luaha khawsa an ni deuh vek a, mahni leh chhungkua chawmtu ber an awm laiin, chutiang ni chiah lo an awm. A then chu an kutdawhna hmunah hian public transport (taxi) a thlah leh lam ziah ngai pawh an awm.

Mizoram Blind Society (MBS) chuan an member bik chungchangah sawrkar, khawtlang hruaitute leh mipuiin hriatpui se an duh an tichhuak a. An member – Elvin Zothantluanga (Ainawn Veng), Lalchhandami Renthlei (Zemabawk North), Zodinpuii (Zemabawk Galili Veng), Vanlalfela (Ainawn Veng), Gory Lalnunthara (Ainawn Veng), Ramthachunga (Ainawn Veng) leh Lalrinchhana (Luangmual West) te bik dinhmun bik an sawi a ni.

Heng an member zing ami, Gory Lalnunthara hian kum 2024 khan chatuan ram a pan tawh a, a dang an member 6 hi an dinhmun chiang takin an hriatpui a; chhungkuaa eizawnna mumal nei lo leh baihvai tak tak an ni. 

Mitvar pangngaite anga hna remchang apiang thawk thei an ni si loa, hetianga bazar leh hmun remchangah rimawi hmanga an zainaa mipui khawngaihna tlingkhawm hian mahni leh chhungkua chawmin harsa takin an khawsa ve tih MBS hian an sawi.

Nikum lam khan Bazarpui leh khawlai hmun danga an member-te eizawnna /zaina kawnga harsatna an tawh chungchangah MBS chuan Dawrpui Local Council chairman, Persons with Disabilities commissioner leh Aizawl bawrhsap hnenah lehkha an lo thehluh sak tawh tih sawiin, ‘Hetianga nitina mipui khawngaihna dila an zai thin thlakna tur, eizawnna ngelnghet leh rinchhan tlak sawrkarin a pek theih hma chuan, an eizawnna hmuh theih ve chhun hi khap loa lo hrethiam hram hram turin sawrkar, tualchhung thuneitute leh mipui kan ngen a ni,’ a ti.

Hetihlai hian, tunhnai deuh atangin hnamdang kutdawh Aizawl khawpuiah an pung nasa a. Chu’ng zingah chuan mitdel leh rualbanlo dangte pawh an awm nual a. Heng mite hi Mizoram Blind Society chuan a hriatpui loa, an pawl member an nih loh bakah member atan pawh an duh loh an awm tih an sawi.

‘Heng hnamdang mitdel leh rualbanlote bakah an chhungte, Aizawl leh Zoram hmun danga kut dawh thin hi, sawrkar leh tualchhung thuneituten an buaipuina kawngah ram leilungfate dinhmun leh harsatna min hriatthiam sak a, anni ho nen angkhata kan society member, Mizoram leilungfate hi en lo turin thuneitute leh mipui kan ngen a ni,’ a ti.

#ZalenNews