Durtlang nula Arini leh Canadian singer Celine Dion te hi an hla sak atang chuan tehkhin chi an ni hauh lo, mahse an zaithiam zia erawh chu khaikhin theih a ni thung. 

Praise On 2016 winner R. Lalrinmawii hi a zaithiam zia sawi nawn a ngai lo - a thiam em avang hian Candian singer ropui Celine Dion hial kan khaikhin a nih ber chu. 

Arini hian hla thar a tichhuak dawn a, zaninah ngaihthlak theih a ni ang. A music video thar hi 'Isu, ka hmangaih che' tih a ni a, Zonet-ah tihchhuah a ni ang a, MDM YouTube channel-ah en tur a awm bawk ang. 

'Isu, ka hmangaih che' tih hla hi David Lalliansanga leh Lalhmachhuana te phuah niin, video hi tun laia hriat hlawh tak Moonshine Studio kutchhuak a ni. Recording hi Kings & Prophets siam sak niin, ngaihthlak nuam tur tak a ni. 

Mizo ten musician kan neih that ber ber - Ephraim (Guitar), Muanpuia (Keys), Bruce Pachuau (Bass) leh Mikeji (Drums) ten an pui a, belhchian a dawlin ngaihthlak a man hla hle dawn a ni. Music recording leh video te an uluk a, Arini a zaithiam bawk avangin mit leh beng a tlai dawn hle a ni.