Mizo Film Award 2023-ah Young Fella a perform dawn e. Young Fella hi Best OST nominee-ah a lang nghe nghe a, an hla hit  'Kha Ni Kha' an sak a rinawm. He hla hi Black Rose OST kha a ni a, YouTube lamah pawh viewer a ngah rem rem hle. 

September 29, 2023 (Zirtawpni) zana sem tur Mizo Film Award atan hian ticket siam a ni a, zawrh chhuah mek a ni. Ticket hi Rs. 100/- man a ni a, Traditional Twist, Zarkawt leh Zalen Office, Treasury Square-ahte lei theihin a awm. Ticket hi 300 chauh siam a ni a, a duh tan chuan ngaihven hma chi a ni ang. 

Mizo Film Award 2023 atana inbuatsaihna hian a vawr tawp a thleng chho mek a, host tur pawh tih fel a ni tawh bawk. Zonet anchor hriat hlawh Zonuni Pachuau chuan a host dawn a ni. Zonuni hi Durtlang Leitan nula n iin, Mizo ten anchor kan neih that ber zinga mi a ni. 

Mizo Film Award 2023 host tura thlan a nih chungchang ZALEN palaiin a zawhna chhangin, "Mizo Film Award buatsaih a ni hi a lawmawm ka ti tak zet a, film lama tui mite pawh phurna nasa tak a siam sak niin ka hria. Kuminah ringawt pawh film tha tak tak a chhuak hnem tawh hle a, hmasawnna hmuh tur awm zel hi a lawmawm hle. An puala hun buatsaih ka host thei tur pawh hi ka phur tawh hle," tiin a sawi. 

Mizo Film Award 2023 hi Entertainment Society of Mizoram buatsaih a ni a, September 29, Zitawpni zan hian Vana pa Hall-ah sem a ni ang.