Aizawl September 26, 2023 : Vawiin khan School Education Minister Lalchhandama Ralte chuan Govt Mizo High School-in thiam thil chi hrang hrang entirna an school compound-a an buatsaih ‘Thul 2023’ a hawng.

Minister chuan ‘Thul 2023’ hawnna inkhawm Govt Mizo High School hall-a neihah thusawiin Govt. Mizo High School-in zirlaite thiam thil tha tak tak phochhuahna a buatsaih chu lawmawm a tih thu a sawi a. Mizote hi talent nei tha tak kan ni tih sawiin National Level Skill competitionah pawh Mizoram-in lawmman pathum kan la a, India hmarchhak huap inelnaah phei chuan sawm chuang kan la thei a, tunah hian khawvel pum huap skill competition-a tel tumin sawrkarin hma a la mek a ni a ti.

Lalchhandama Ralte chuan NEP 2020 hian zirna pangngai leh skill development hi a kaikawp vek a, hemi mil hian zirna kalpui dan tur pawh ruahman a ni a, School bag ah loh ni te pawh siam a ni a ti. Minister chuan ram changkangho hi skill-ah an sang a, Pathianin talent a pek te peipunga pho chhuak tura an beihna a ropui a ti. Thul 2023-a zirlaite thiamna pho chhuah chuan eizawnna tlaka thiamna nei turin a pui zel ang tih a beisei thu a sawi bawk.

Minister hian School website www.mizohighschool.edu.in a hawng nghal bawk.

Govt. Mizo High School Thul Exhibition 2023-ah hian zirlaite thu leh hla ziah tarlanna Ink on paper tih chu Lalchhandama Ralte-in a tlangzarh a, Lalnunpuia Hrahsel lehkhabu ziah ‘Englo’ tih chu  Lalsangliana School Education Director-in a tlangzarh bawk.