November 29, 2022; Mizo hmeichhiate zinga Aizawl city bus conductor hmasa ber (conductor license nei) Nl. Vangsangkimi d/o R. Lalfaka (L) Lawipu, Aizawl in kumin April atanga conductor hna a thawh hnuah vawiin thlengin hmeichhe city bus conductor 7 an awm belh leh tawh. Nl Sangkimi hi Mizo hmeichhiate tana sulsutu pawimawh, mipate thawh tur chauh nia ngaihdan nghet tak awm rawn thiattu langsar leh hriatreng tawh tur a ni.

Kum 23 na hmang mek  Nl Sangkimi hian pawl 12 tha taka a zawh hnuah, IGNOU ah BA a chhunzawm a, Lawipui veng, Aizawl ah a nu hova khawsa an ni. Aizawl City Bus Owners Association pawhin chawimawina an lo hlan tawh.

ZALEN thudawn danin, Nl Sangkimin city bus conductor a thawh hnuah hmeichhe dang conductor mi 7 an awm belh tawh a, chung zingah chuan driver ten conductor atana an nupuite an hruai nupa tuak 5 an awm. 
Taima leh thawhhreh neilo tan chuan thawh senloh hna tamtak a awm tih nemnghet nawntu chu Nl Sangkimi hi a ni a, hmeichhe awmnem zawkte tan pawh mipate thawh theih ang tam tak thawh ve theih a ni tih nemnghet nawn leh tu pawh Nl Sangkimi hi a ni.

ZALEN in biakna ah Nl Sangkimi chuan, "Tun ang laiah chuan hnathawh zah hian awmzia a awm lo a, ei mah kan zah loh chuan thawh zah tur a ni lo," tiin, "Eng hna pawh hi dik tak leh taima taka thawh chuan hna hniam a awm lo a, hna zahawm vek a ni," a ti. "Rinawm ila, taima bawk i la, thawh zah nei lo bawk i la, chutah chuan hlawhtlinna a awm vek," ti bawkin, kan huntawn mil zel a kan insiamrem ve a ngaih thu a sawi.