Aizawl July ni 17, 2023: Vawiin hian Mizo Hnam Run chhung inkhawm neih a ni a. Hun hnihnaah Prof. F. Lalnunmawia, MLA leh MNF Adviser chuan thu sawiin, "Uniform Civil Code (UCC) do turin Mizoram Political party zingah MNF baka tha an awm lo," a ti a, Zoramthanga leh Mizoram MP te hmalakna vangin tribal te chenna NE State te pawh CAB/CAA exempt a nih thu leh he dan hian a huam ve lo niin a sawi.

Prof Mawitea chuan, "MNF sawrkar hian CAB/CAA pawh theihtawpin a lo do tawh a. CAB kan duh loh thu Assembly Session ah March 20, 2019 ah passed a ni tawh a; a hnu October 5, 2019 khan CM zahawm tak, Pu Zoramthanga’n hmaichhanah he dan kan duh loh thu Union HM Pu Amit Shah a hrilh a, kan MP te pahnih pawhin he bill an duhloh thu hi an auchhuah pui bawk a ni. Tichuan, tribal te chenna NE State te chu exempt kan ni ta a, he dan hian min huam ve ta lo a ni," a ti.

"Tunah UCC hman tum thawm a lo ri leh a, hei pawh hi kumin Assembly Session February 14, 2023 khan kan duhloh thu kan pass tawh bawk a nih kha. Kan CM zahawmtak, MNF President ni bawk chuan Central sorkar ah UCC kan duh loh thu ziak in a thlen tawh bawk a ni. Kan MP te pahnih hian UCC an dodal thu an au chhuahpui mek bawk a ni. Hetiang taka Mizoram leh Mizote himna atana tang ngam leh a tul huna sawrkar laipui dodal ngam MNF ang hi party dang an awm lo," a ti.

MNF Adviser chuan, "Zo hnahthlak ram hrang hranga thendarh a awmte kuahkhawm tura hma lak kan tum thu hi 2018-a kan Election Manifesto Political Policy No.1 a kan lo ziak sa diam tawh. Tuna kan unau Zohnahthlak te Mizoram a rawn tlan khawm mekte hi Pu Zoramthanga kaihhruai MNF sorkar chuan pa chan changin alo kuahkhawm a, huaisen takin an thlavang a hauh a ni. Hei hi zoram chhung leh pawna cheng Zofaten  thlamuanthlak an tiin, MNF sorkar chungah rinna an nghat mek a ni," a ti.