DOWNLOAD OUR APP

Read latest news on your phone
app-store

Mizo leh Mizo inbumna; A bultumtu ber nia hriat CNB ten Bangalore ah man

Jun 22, 2022

A bultumtu ber nia ngaih, Mizo nu hian Mizoram lama mi harsa zawkte leh chinchang hre tlem deuhte chu pawisa an hlawh theihna tur sawi mawi a thlemin, smuggling a tih tir thin a, a tirh te hian ruihhlo an hawn dawn tih an hrelawk ngailo niin Bangalore Mizo Association chuan thuchhuah siamin an tarlang.

June 22; 2022; Human trafficking leh smuggling kaihhnawih a mibum a, sumdawnna kalpui thin nia hriat, Aizawl a khawsa (a address leh hming hriat ni tawh mahse, mumal taka confirm theih a la ni lo.) Mizo nu pakhat chu, diklo tak a a mi bum, Mizo 7 te Bangalore airport a man an nih hnulawkah, Central Narcotics Bureau (CNB) ten an man tel ve nghal nia thudawn a ni.

Hemi kaihhnawihah hian Bangalore Mizo Association (BMA) chuan nizan (June 21, 2022) khan thuchhuah siamin, Zoram pawn Mizo ten an buaipui em em human trafficking leh smuggling chungchangah thil duhawm lo tak Bangalore ah a thleng leh ta tih an tarlang a, pawi an ti tak zet tih an tarlang.

BMA thuchhuah tarlan danin, Mizo nu pakhat chuan, senso tumsak bak ah pawisa hlawha ramdanga zin tura a Mizo puite thlemin, zin tura a sawm te hi South Africa leh Rwanda lamah zinin, an bungraw rawn hawn chu heroin a ni tih thuneitu ten an hriat vangin man an ni a. Mizo nu ngeiina a thlem Mizo 7 te chu, May 2022 thla tawp lam khan South Africa atangin India ram an lo let a, Bangalore Airport ah Custom in an bungrua an lo dap a, an bungrua chu heroin hlir a nih vangin man an ni a, Jail ah dah an ni.

Hetih lai hian tun hnai maiah hetiang thil ti tura kal tho Mizo 3 te chu India ram an rawn luh hmain Rwanda ah man an lo ni tawh tih BMA thuchhuah ah chuan tarlan a ni bawk.

ZALEN thudawn danin, he thil thleng a a bul tumtu ber Mizo nu chu a mi bumte man an nih hnulawk ah CNB ten airport-ah an parcel tur a awm tiin thiam takin an thlem a, Delhi atanga an koh chhoh hnu-ah Bangalore airport ah an lo man ve nghal a, Nigerian mi thurualpui an nei nia hriat a ni.

Share now